Almatyda júk kólikteriniń qozǵalysyn jappaı toqtatýǵa shaqyrǵan turǵyn qamaýǵa alyndy
ASTANA. KAZINFORM – Almatyda júk kólikteriniń júrgizýshilerin salmaq shekteýlerine qarsy narazylyq aktsııasyna shyǵýǵa shaqyrǵan 41 jastaǵy turǵyn ákimshilik jaýapkershilikke tartyldy, dep habarlaıdy qalalyq polıtsııa departamenti.
Polıtsııanyń málimetinshe, áleýmettik jelide er adamnyń beıneúndeýi taraǵan. Onda ol júrgizýshilerdi 1 qarasha kúni júk kólikteriniń qozǵalysyn uıymdasqan túrde toqtatýǵa shaqyrǵan.
Quqyq qorǵaý organdary beınejazba avtorynyń jeke basyn anyqtady.
– Úndeý avtory 41 jastaǵy A. Baımuhanov bolyp shyqty. Ruqsat etilmegen buqaralyq is-shara uıymdastyrýǵa shaqyrǵany úshin ol ákimshilik jaýapkershilikke tartyldy. Sot sheshimimen kináli dep tanylyp, 15 táýlikke ákimshilik qamaýǵa alyndy, – delingen polıtsııa habarlamasynda.
Aıta keteıik, bıyl shilde aıynan bastap Almatyda aýyr júk kólikteriniń qozǵalysyna shekteýler engizilgen bolatyn. Kún saıyn saǵat 07:00-den 22:00-ge deıin oske túsetin júktemesi 8 tonnadan asatyn júk kólikterine Saın kóshesi, Ál-Farabı dańǵyly, Shyǵys aınalma avtomobıl joly jáne Rysqulov dańǵylymen shektelgen aýmaqta júrýge tyıym salynǵan.
Buǵan deıin qyrkúıek aıynda Almatyda atalǵan shekteýlerdi buzǵany úshin 3,7 myńnan astam júk kóliginiń júrgizýshisi ákimshilik jaýapkershilikke tartylǵany habarlanǵan edi.
