Almatyda júk kólikterine baqylaý kúsheıtildi
ALMATY. KAZINFORM — Almaty qalasynyń polıtsııasyna turǵyn úı alaptarynda júk kólikteriniń qozǵalysyna qatysty turǵyndardan birqatar shaǵymdar tústi, dep habarlaıdy Polisia.kz.
Ótinishterde júk kólikteriniń aýlalar arqyly qatynaýy, abattandyrý qaǵıdalaryn buzýy, kógaldar men jasyl jelek aýmaqtaryna kirý faktileri kórsetilgen. Sondaı-aq assenızatorlyq kólikterdiń jumysyna qatysty máseleler de kóterildi.
Osyǵan baılanysty Alataý aýdanynda quqyq buzýshylyqtardyń aldyn alý jáne olardyń jolyn kesý maqsatynda arnaıy reıdtik is-sharalar uıymdastyryldy.
Tekserý barysynda polıtsııa qyzmetkerleri jol qozǵalysy qaýipsizdigi talaptarynyń saqtalmaýy, kólik quraldaryn paıdalaný qaǵıdalarynyń buzylýy, sondaı-aq qalalyq ınfraqurylymdy paıdalaný jáne kútip ustaý jónindegi zań talaptarynyń oryndalmaýy faktilerin anyqtady.
Anyqtalǵan barlyq quqyq buzýshylyqtar boıynsha qoldanystaǵy zańnamaǵa sáıkes ákimshilik sharalar qabyldandy.
— Turǵyndardyń ótinishteri nazardan tys qalǵan joq. Biz naqty máseleler kóterilgen aýmaqtarda arnaıy tekserý jumystaryn júrgizdik. Negizgi maqsat — turǵyn úı alaptarynda qoǵamdyq tártipti qamtamasyz etý, turǵyndardyń qaýipsizdigine qater tóndiretin ári qolaısyzdyq týǵyzatyn quqyq buzýshylyqtardyń aldyn alý. Bul baǵyttaǵy jumystar aldaǵy ýaqytta da jalǵasady, — dedi Alataý aýdandyq polıtsııa basqarmasy bastyǵynyń orynbasary Danııar Plalov.
Eske salaıyq, Almatyda júrgizýshini tapanshamen qorqytqan azamat ustaldy.
