Almatyda júk kóligi jardan qulap, jer úıdi qıratty

ALMATY. KAZINFORM — Almatynyń Medeý aýdanynda beton tasıtyn júk kóligi jardan qulap, jeke úıge soǵyldy.  

Qalalyq polıtsııa departamentiniń málimetine sáıkes, jol-kólik oqıǵasy 13 qyrkúıek 20:00 shamasynda bolǵan.

— Júk kóliginiń júrgizýshisi Kamenskıı ústirtindegi Qaınar kóshesimen kele jatyp, kóliktiń óz betinshe qozǵalýyna jol bermeý sharalaryn qoldanbaǵan. Sonyń saldarynan aýyr júk kóligi ońtústik baǵytta óz betinshe ketip qalyp, úıdiń qorshaýyna soǵylǵan. Jol-kólik oqıǵasy saldarynan eshkim zardap shekken joq. Medeý aýdandyq polıtsııa basqarmasynyń qyzmetkerleri apattyń mán-jaıyn anyqtaýǵa kiristi, — dep habarlady qalalyq PD qyzmeti.

Eske salaıyq, keshe Almaty mańynda avtobýstyń kópirden kóliktiń ústine qulaǵanyn jazǵan bolatynbyz.