Almatyda júk kóligi beton qorshaýǵa soǵyldy
ASTANA. KAZINFORM — Almatyda júk kóligi jol ótkeliniń astyndaǵy beton qorshaýǵa soǵyldy. Jol-kólik oqıǵasynyń sáti beınebaqylaý kameralaryna túsip qalǵan. Bul týraly Almaty qalasynyń polıtsııa departamenti málimdedi.
Jol-kólik oqıǵasy Áýezov aýdanynda, Saıyn kóshesinde, Abaı dańǵylynyń jolaıyryǵy astynda bolǵan.
Aldyn ala málimet boıynsha, soltústik baǵytta kele jatqan «Shacman» júk kóliginiń júrgizýshisi rólge ıe bola almaı, beton qorshaýǵa soǵylǵan. Soqqynyń qatty bolǵany sonshalyq, kólik kabınasy edáýir zaqymdanǵan. Abyroı bolǵanda, jol-kólik oqıǵasy saldarynan eshkim zardap shekken joq.
Oqıǵa boıynsha polıtsııa qyzmetkerleri ákimshilik materıal rásimdedi. Polıtsııa júrgizýshilerge kólik basqarý kezinde jyldamdyqty qatań saqtap, joldaǵy jaǵdaıdy eskerip, rólde otyryp nazardy joǵaltpaý qajettigin taǵy da eske salady.
Eske sala keteıik, buǵan deıin Taldyqorǵanda jedel járdem kóligi jol apatyna ushyraǵanyn jazǵan edik.
