Almatyda JRVI juqtyrǵan 260-tan astam bala aýrýhanaǵa jatqyzyldy
ALMATY. KAZINFORM – Almatyda maýsymdyq aýrýshańdyqtyń ósýine baılanysty medıtsınalyq uıymdar kúsheıtilgen rejımde jumys istep jatyr.
Almaty Qoǵamdyq densaýlyq saqtaý basqarmasy basshysynyń orynbasary Láılá Imanǵalıeva óńirlik kommýnıkatsııalar qyzmetiniń alańynda 360 tósekke arnalǵan 11 bólimshe jumys istep turǵanyn aıtty. Balalarǵa qalalyq klınıkalyq ınfektsııalyq aýrýhanasy men onyń eki bólimshesinde táýlik boıy mamandandyrylǵan medıtsınalyq kómek kórsetiledi. Qajet bolǵan jaǵdaıda qorda taǵy 67 tósek qarastyrylǵan.
- 23 qyrkúıektegi jaǵdaı boıynsha Balalar qalalyq klınıkalyq ınfektsııalyq aýrýhanasynda JRVI dıagnozymen 263 bala em alyp jatyr, onyń 60-da pnevmonııa anyqtalǵan. Jansaqtaý bóliminde tórt bala bar, olardyń ekeýi ókpeni jasandy jeldetý apparatyna qosylǵan, - dedi Imanǵalıeva.
Sózinshe, eresekter úshin S.Jekenova atyndaǵy Qalalyq klınıkalyq ınfektsııalyq aýrýhanada 200 tósek-oryn daıyndalǵan. Sondaı-aq taǵy 50 rezervtik tósek qarastyrylǵan.
- Qazir onda JRVI dıagnozymen 59 patsıent em alyp jatyr, onyń ishinde 15-i – júkti áıel. Sondaı-aq pnevmonııamen túsken taǵy bes eresek patsıent bar. Jansaqtaý bólimi men ókpeni jasandy jeldetý apparatynda jatqan patsıentter joq, - dedi ol.
Júkti áıelder úshin úıge shaqyratyndarǵa basymdyqpen qyzmet kórsetý, kúndelikti patronaj ben densaýlyǵyn baqylaý uıymdastyrylǵan. Qajet bolǵan jaǵdaıda patsıentter ýaqytyly aýrýhanaǵa jatqyzylady.
Júktilik merzimi 22 aptadan asqan áıelderge №4 Qalalyq perzenthanada mamandandyrylǵan medıtsınalyq kómek kórsetiledi. Onda qazir JRVI dıagnozymen 32 júkti áıel em alyp jatyr. Pnevmonııamen eshkim tirkelgen joq, jansaqtaý bólimi men ókpeni jasandy jeldetý apparatynda júkti áıelder joq.
Ýaqytyly áreket etý maqsatynda qalada epıdemıologııalyq qadaǵalaýdyń segiz dozorlyq ortalyǵy jumys isteıdi.
Láılá Imanǵalıevanyń aıtýynsha, medıtsınalyq uıymdar qajetti dárilik preparatpen, jeke qorǵanys quraldarymen qamtamasyz etilgen.
Tumaýǵa qarsy 200 myń vaktsına
Tumaýdyń aldyn alý úshin jergilikti bıýdjet esebinen «Grıppol Plıýs» úshvalentti vaktsınasynyń 250 myń dozasy satyp alyndy.
Tegin vaktsına alatyndar:
* medıtsına qyzmetkerleri,
* medıtsınalyq baqylaýdaǵy balalar,
* alty aıdan asqan jıi aýyratyn balalar,
* jetim balalar men ata-anasynyń qamqorlyǵynsyz qalǵan balalar,
* sábıler úıleriniń tárbıelenýshileri,
* medıtsınalyq-áleýmettik mekemelerdiń qyzmet alýshylary,
* júktiliktiń ekinshi jáne úshinshi trımestrindegi áıelder,
* júrek-qan tamyrlary jáne tynys alý júıeleriniń sozylmaly aýrýlary bar adamdar,
* epıdemıologııalyq kórsetkishter boıynsha vaktsınatsııalaýǵa jatatyn tulǵalar.
Qalǵan turǵyndar úshin vaktsınatsııa aqyly.
Eske salsaq, elimizde JRVI juqtyrǵandar sany 1,8 esege azaıǵany habarlandy.
