Almatyda JRVI jáne tumaýmen aýyrǵandar sany azaıdy
ALMATY. KAZINFORM – Almatyda jedel respıratorlyq vırýstyq ınfektsııalar (JRVI) boıynsha epıdemıologııalyq jaǵdaı birqalypty.
Almaty sanıtarııalyq-epıdemıologııalyq baqylaý departamenti basshysynyń orynbasary Ásel Qalyqovanyń málimetinshe, keıingi bir aptada 8 322 naýqas tirkelgen, bul aldyńǵy aptadan 31,4%, byltyrǵy osy ýaqytpen salystyrǵanda 38,6%-ǵa tómen. Baqylaý deńgeıinen asyp ketetindeı jaǵdaı bolǵan joq, tumaýmen aýyrǵan barlyq naýqastyń jaǵdaıy qalypty.
Quzyrly mekemelerdiń málimetine qaraǵanda, JRVI-men syrqattaný kórsetkishi 100 myń turǵynǵa shaqqanda 354,38 bolǵan. Aýyrǵandardyń jartysynan kóbi (52,3%) – bala, 4 351 bala tirkelgen. Bir aptada JRVI dıagnozymen 312 adam aýrýhanaǵa jatqyzyldy, onyń ishinde 36 júkti áıel men bir jasqa deıingi 56 bala bar. Pnevmonııamen aýyrǵan 57 naýqas statsıonarǵa jiberildi, onyń 14-i – 14 jasqa deıingi bala, sondaı-aq arasynda 8 náreste bar.
2025 jyldyń 40-aptasynan osy jyldyń alǵashqy aptasyna deıin Almatyda 250 696 JRVI tirkeldi. Syrqattaný kórsetkishi 10 675,52 bolyp, byltyrǵy deńgeımen shamalas bolyp shyqty. Aýyrǵandardyń arasyndaǵy balalardyń úlesi – 58,4%. Osy kezeńde JRVI asqynǵan 5 332 adam aýrýhanaǵa jatqyzyldy, olardyń arasynda 548-i júkti áıel men bir jasqa deıingi 822 bala bar. Pnevmonııamen 1 031 naýqas aýrýhanaǵa tústi, onyń 216-sy 14 jasqa deıingi balalar men bir jasqa deıingi 67 sábı taǵy bar.
– Qalanyń 33 bilim berý uıymynda JRVI-men aýyrǵan 76 oqýshy anyqtaldy. Syrqattaný shekti deńgeıden aspaıdy: oqýshylar arasyndaǵy aýrý úlesi 10%-dan joǵary bolǵan joq. Sonymen qatar oqýshylardyń qysqy demalysta bolǵany da eskerildi. Bilim berý uıymdarynda JRVI men tumaý belgileri bar balalar men qyzmetkerlerdi der kezinde anyqtaý úshin kúndelikti «tańǵy» jáne aýysymdyq tekseris qatar júrip jatyr, - dedi vedomstvo ókili.
Almatydaǵy Ulttyq saraptama ortalyǵy bólimshesiniń vırýsologııalyq zerthanasy baqylaýdy jalǵastyryp jatyr. 1 qazannan beri tumaýǵa 1 253 synama zerttelip, onyń 83-inen oń nátıje anyqtaldy. Barlyǵy tumaýdyń A/H3N2 túri. Tumaýǵa jatpaıtyn vırýstarǵa 238 synama tekserilip, 24 jaǵdaıda rınovırýs, respıratorlyq-sıntsıtıaldy vırýs, paragrıpp, adenovırýs pen maýsymdyq koronavırýstyń ınfektsııasy tabyldy.
Epıdemııalyq maýsym bastalǵaly beri zerthanada 83 ret tumaýdyń taraǵany rastaldy, olardyń barlyǵy vaktsına almaǵandar bolyp shyqqan. Barlyq naýqas emdelip jatyr, olardyń jaǵdaıy birqalypty.
– Almatydaǵy USO bólimshesinde tumaý, tumaýǵa jatpaıtyn JRVI men COVID-19 vırýstaryna PTR-zertteý júrgizýge arnalǵan test-júıeler men reagentterdiń jetkilikti qory bar. DDSU boljamyna sáıkes, kúzgi-qysqy maýsymda tumaýdyń A/H1N1/pdm09 jáne A/H3N2 vırýstary qatar aınalymda bolyp, V vırýsy qosylýy múmkin, alaıda A/H3N2 túri basym bolyp shyǵýy bek múmkin, - dedi Ásel Qalyqova.
Eske salaıyq, buǵan deıin Batys Qazaqstan oblysynda shoshqa tumaýy da tirkelgenin jazǵan edik.