Almatyda JRVI órshýine baılanysty jańajyldyq erteńgilikter ótpeı qalýy múmkin be

ALMATY. KAZINFORM — Almatynyń sanıtarlyq qyzmeti Jańa jyl qarsańynda mektepter men balabaqshalarda jappaı is-sharalardy shekteýdi usyndy. Buǵan JRVI men tumaýmen aýyrǵandar sanynyń ósýi sebep bolyp otyr. 

Qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqova epıdemıologııalyq ahýalǵa qatysty jappaı is-sharalardan bas tartýdy usyndy. Ol bul týraly Óńirlik kommýnıkatsııalar qyzmetindegi brıfıngte aıtty. Alaıda merekelik erteńgilikterdi tegis toqtatý ázirshe josparlanyp otyrǵan joq.

— Qazirgi ýaqytta tolyqqandy tyıym salý máselesi qarastyrylyp otyrǵan joq. Sebebi osy aptadaǵy aýyrǵandar sany aldyńǵy aptamen salystyrǵanda 1,5 ese nemese odan kóp óspedi. Bul — bas memlekettik sanıtarlyq dárigerdiń qaýlysynda qarastyrylǵan talap. Jalpy alǵanda, múmkindiginshe shekteý engizý, ıaǵnı is-sharalardy basqa formatta ótkizý, kóp adam jınalýyna jol bermeý talaptary saqtalady, — dedi Qalyqova.

Ol sondaı-aq mektepter men balabaqshalarda merekelik sharaǵa daıyndyq kezinde balalardy aldyn ala tekserip alý qajet ekenin aıtty. Bala sabaqqa kelmese, onyń sebebin bilip, aýrý belgileri barlardy merekelik erteńgilikke qatystyrmaǵan jón.

Vedomstvo dereginshe, Almatyda 47-aptada JRVI-diń 32 456 deregi tirkelgen. Bul aldyńǵy aptamen salystyrǵanda 17,6%, al byltyrǵy dál osy kezeńmen salystyrǵanda 37,2% kóp. Aýyrǵandardyń 58,5%-y (18 992 derek) — balalar.

Eske salaıyq, buǵan deıin Almaty sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly JRVI, tumaý boıynsha maýsymdyq ósim bar ekenin aıtqan edi.