Almatyda JRVI men tumaý juqtyrý kórsetkishi 40 paıyzǵa tómendegen
ALMATY. KAZINFORM — Almatynyń bas sanıtarlyq dárigeri Qasymhan Alpysbaıuly megapolıstegi epıdemıologııalyq jaǵdaı jóninde baıandady.
Onyń aıtýynsha, ótken aptada JRVI-diń 6062 jaǵdaıy tirkelgen. 100 myń turǵynǵa shaqqanda syrqattanýshylyq kórsetkishi — 258 adam. Bul onyń aldyndaǵy apta kórsetkishinen 40,9%-ǵa tómen, ol kezde 10269 jaǵdaı bolǵan. Aýrý juqtyrǵandardyń jartysy balalar — 50,2% nemese 3043 jaǵdaı.
— Qalanyń 21 mektebinde oqýshylar arasynda shekti deńgeıden aspaıtyn JRVI juqtyrýdyń 38 jaǵdaıy tirkeldi, oqýshylar kóktemgi demalysta. Odan bólek qalada A/H3N2 tıpti tumaý vırýsy, rınovırýs, RS vırýs, paragrıpp, adenovırýs, metapnevmovırýs jáne maýsymdyq koronavırýs sııaqty basqa da tumaýǵa jatpaıtyn JRVI vırýstary aınalymda bar, — dedi Qasymhan Alpysbaıuly.
Maman JRVI men tumaýdy aldyn alý úshin qarapaıym qadaıdardy esten shyǵarmaý kerek ekenin eskertti. Olardyń qatarynda: S dárýmenin, oksolın syqpasyn qoldaný, bólmelerde ylǵalmen tazalap, jeldetý, sondaı-aq aýyrǵan jaǵdaıda óz betimen em-dom qoldanbaı, medıtsına qyzmetkerin shaqyrýy qajet. Aýyrǵan balalardy mektepke, mektepke deıingi balalar mekemelerine, mádenı is-sharalar júrgiziletin oryndarǵa jibermeý qajet.
Eske salaıyq, buǵan deıin Almatyda tumaý juqtyrǵandary sany 10 myńnan asqanyn jazǵanbyz.
