Almatyda JRVI-men aýyrǵandar sany artty

Almatyda ótken aptada JRVI-di 15 380 adam juqtyrǵan, bul ótken jyldyń sáıkes kezeńimen salystarǵanda 5,2%-ǵa (13 984 jaǵdaı) joǵary. Sondaı-aq balalar arasynda aýrýdyń taralý deńgeıi 44,3%-dy qurady. Bul týraly Almaty qalalyq sanıtarııalyq-epıdemıologııalyq baqylaý departamenti basshysynyń orynbasary Aıgúl Qalyqova aıtty, dep habarlaıdy Kazinform.  

«Ótken jyldyń qarasha aıynan basynan bastap A/H3N2 tıpti tumaýdyń 206 rastalǵan jaǵdaıy tirkeldi, barlyq naýqasqa emdeý taǵaıyndaldy, qazir olardyń jaǵdaıy qanaǵattanarlyq. Qalada jiti respıratorlyq vırýstyq ınfektsııalardyń basqa vırýstary: rınovırýs, bokavırýs, RS vırýs, adenovırýs, paragrıpp, maýsymdyq koronavırýs aınalymda júr», - dedi Aıgúl Qalyqova.

Ol sondaı-aq JRVI, tumaýdy aldyn alý sharalaryn saqtaýdy usyndy.

«Dárigerdiń taǵaıyndaýymen ımmýndyq júıeni kóterý kerek, ıaǵnı, S dárýmenin, oksolın jaqpa maıyn qoldaný qajet. Jappaı is-sharalar ótetin oryndarǵa barýdy shekteńiz, bólmelerde ylǵaldy jınaý júrgizip, jeldetip otyrý kerek, JRVI-men aýyrǵan adamdarmen qarym-qatynasqa túspeý, qarym-qatynas bolǵan jaǵdaıda betperde kıip, jeke gıgıena erejelerin saqtaý qajet. Aýyrǵan jaǵdaıda úıde bolǵan jón, ózin-ózi emdemeı, medıtsına qyzmetkerin shaqyrý qajet, túshkirý, jótelý kezinde aýyzdy qolmen, maılyqpen, oramalmen jabý kerek. Qoldy múmkindiginshe jıi jýý kerek. Naýqas balalardy mektepke, mektepke deıingi mekemelerge, mádenı-buqaralyq is-sharalar ótetin oryndarǵa jibermegen durys», - dedi dáriger.