Almatyda joıqyn jer silkinisine negiz joq — seısmologtar
ALMATY. KAZINFORM - Seısmologtar Almatyda tańerteń bolǵan jer silkinisinen keıingi jaǵdaıdy turaqty dep baǵalady. Joıqyn jer silkinisin kútýge negiz joq.
Jer silkinisi 28 qyrkúıek saǵat 09:38-de tirkeldi. Jerasty dúmpýleriniń kúshi Almatyda 3–4 ball boldy.
Jer silkinisinen keıin TJM Seısmologııalyq baqylaýlar men zertteýler ulttyq ǵylymı ortalyǵynyń komıssııasy geofızıkalyq, seısmologııalyq, gıdrohımııalyq, gıdrodınamıkalyq jáne basqa da baqylaýlardyń derekterin taldady.
Mamandardyń aıtýynsha, bul jer silkinisi aımaqtaǵy qalypty seısmıkalyq belsendilik aıasynda bolǵan.
— Almaty boljamdyq polıgonyndaǵy qazirgi seısmıkalyq jaǵdaı turaqty dep baǵalandy. Komıssııanyń qazirgi baǵalaýyna sáıkes, Almaty boljamdyq polıgony aýmaǵynda joıqyn jer silkinisin kútýge negiz joq, — dep habarlady TJM.
Sonymen qatar ortalyq seısmıkalyq jaǵdaıdy baqylaý jalǵasyp jatqanyn atap ótti. Mamandar derekterdi turaqty túrde taldap jatyr.
Buǵan deıin TJM jer silkinisinen keıin «Qazseldenqorǵaý» mamandary ózen arnalary, gıdrotehnıkalyq qurylystar, kóshkin jáne sel qaýpi bar ýchaskeler, sondaı-aq tirshilikti qamtamasyz etý nysandaryn teksergenin habarlaǵan edi. Zaqymdaný faktileri anyqtalǵan joq. Qıraý nemese zardap shekkender týraly aqparat túsken joq.
Eske salsaq, Almatyda jer silkinisiniń kúshi 4 balǵa jýyqtaǵany habarlandy.
Almaty TJD jer silkinisine qatysty málimdeme jasap, jaǵdaı baqylaýda ekenin aıtty.
