Almatyda JOO-lardyń birinen tútin shyǵyp, stýdentter evakýatsııalandy
ALMATY. KAZINFORM - Almatyda Satbayev University-niń bas oqý ǵımaratynan (Q.Sátpaev atyndaǵy Qazaq ulttyq tehnıkalyq zertteý ýnıversıteti) tútin shyqty. Áleýmettik jelide oqý ornynan evakýatsııalanyp jatqan stýdentterdiń vıdeosy taralyp jatyr.
Ýnıversıtettiń baspasóz qyzmeti ǵımarattyń jylý jelisinen aqaý shyqqany jáne qabattardyń birinde jóndeý jumystary júrgizilip jatqanyn habarlady.
«Jóndeýshilerdiń biri bolgarka quralymen jumys istep jatqan sátte odan shyqqan ushqyn shúberek zatqa túsip, ol birtindep tútindep, ıisi shyǵa bastaǵan. Shúberek zat órt sóndirýdiń barlyq erejesine sáıkes joıyldy. Eshqandaı órt shyqqan joq, biraq dabyl oınaǵan soń, sol qabattaǵy adamdar syrtqa evakýatsııalandy. Zardap shekkender joq», - dep habarlady JOO baspasóz qyzmeti.
