Almatyda jóndeýden keıin ashylǵan qoǵamdyq keńistik qaıta jabylyp qaldy
ALMATY. KAZINFORM — N.Sats atyndaǵy teatrdyń aldyndaǵy jańa qoǵamdyq keńistik jaqynda paıdalanýǵa berildi.
Nysan almatylyqtar arasynda birden qyzyǵýshylyq týdyrdy. Ásirese, balalar úshin erekshe demalys ornyna aınaldy. Jańa qoǵamdyq keńistiktiń beınejazbalary áleýmettik jelide keńinen tarady.
Alaıda Saltanat Mahmut esimdi turǵyn birneshe kúnde tanymal bolǵan keńistik qaıtadan jabylyp qalǵanyn aıtyp, beınejazba jarııalady. Ol bul oryndy jeliden kórip, balalarmen kelgen. Alaıda alań qorshalyp, kirýge shekteý qoıylǵan. Aıtýynsha, oǵan qoǵamdyq keńistiktiń keı tustary synýy sebep bolǵan.
Atalǵan jaǵdaıǵa baılanysty Almaty qalasy Qoǵamdyq keńistikterdi damytý basqarmasy túsinikteme berdi. Vedomstvo málimetinshe, turǵyndardyń jańa qoǵamdyq keńistikke degen qyzyǵýshylyǵyna baılanysty alǵashqy eki kúnde alańǵa óte úlken salmaq túsken.
— Óte kóp adamnyń bir mezette jınalýynan jáne oıyn elementteriniń belgilengen mólsherden tys paıdalanylýynan keıbir qurylymdar zaqymdanyp, ýaqytsha isten shyqty, — dep habarlady basqarma ókilderi.
Sonymen qatar vedomstvo alań jabylýyna qurǵaq fontannyń sý júıesine jospardan tys tehnıkalyq qyzmet kórsetý qajettiligi de áser etkenin atap ótti.
— Balalardyń sýda belsendi oınaýynan sý tez lastanǵan. Kishkentaı kelýshilerdiń densaýlyǵyna tónetin qaýip-qaterdi tolyqtaı joıý úshin mamandar hımııalyq reagentterdi tolyq aýystyryp, súzgileý júıelerin tazalaý jáne retteý jumystaryn júrgizip jatyr. Qazirgi ýaqytta nysanda qalpyna keltirý jáne iske qosý-baptaý jumystary júrgizilýde. Balalardyń qaýipsizdigi men densaýlyǵy — biz úshin basty basymdyq, sondyqtan barlyq tehnıkalyq protsedýra aıaqtalǵan boıda alań qaıta ashylady, — delingen basqarma jaýabynda.
Eske salaıyq, 2025 jyly Almatyda N.Sats atyndaǵy teatrdy jańǵyrtý jumystary bastaldy.
Joba quny — 24 mlrd teńgege jýyq. Jańarǵan nysan bıyl paıdalanýǵa berilýi tıis.
