Almatyda Aqsaı ózeninde táýlik boıy baqylaý júrgizilip jatyr
ASTANA. KAZINFORM — Almatyda Aqsaı ózeni arnasy boıyndaǵy gıdrologııalyq ahýalǵa úzdiksiz monıtorıng júrgizip jatyr.
1 shildeden bastap búgingi kúnge deıin Almaty tótenshe jaǵdaılar departamentiniń qyzmetkerleri Qutqarý qyzmetimen, «Qazseldenqorǵaý» memlekettik mekemesimen, «Barys» respýblıkalyq jedel-qutqarý jasaǵymen jáne Naýryzbaı aýdany ákimdigimen birlesip Aqsaı ózeni arnasy boıyndaǵy gıdrologııalyq ahýalǵa úzdiksiz monıtorıng júrgizip keledi.
Almaty tótenshe jaǵdaılar departamentiniń málimetinshe, qazirgi tańda jaǵdaı tolyq baqylaýda. Barlyq jumyldyrylǵan qyzmetterdiń jumysyn úılestiretin jedel shtab óz jumysyn jalǵastyryp jatyr.
— 1 shilde kúni taýly aımaqtardan keletin sý kóleminiń artýyna baılanysty baý-baqsha seriktestikteriniń birine aparatyn kirme joldyń bir bóligine zaqym kelip, sondaı-aq elektr jelisiniń bir baǵanasy qulady. Jedel qyzmetterdiń úılesimdi is-qımyly men arnaıy ınjenerlik tehnıkanyń kómegimen jol qalpyna keltirilip, kóliktiń qaýipsiz qozǵalysyn qamtamasyz etý úshin qajetti jumystar tolyq oryndaldy, — delingen habarlamada.
Gıdrologııalyq ahýalǵa monıtorıng táýlik boıy úzdiksiz júrgizilip jatyr. Barlyq qyzmet jaǵdaıdyń kez kelgen ózgerisine jedel den qoıýǵa tolyq daıyn.
Eske salaıyq, buǵan deıin 2 shilde saǵat tańǵy 06:50 shamasynda Aqsaı ózeninde sý deńgeıi kóterilip, Qarasaı aýdany Janaturmys aýylyndaǵy «Karer Aksaı» JShS aýmaǵyndaǵy karerdiń soltústik-batys bóliginde topyraq shaıyldy. Sonyń saldarynan 9 jeke úıdiń turǵyndaryn ýaqytsha kóshirilgenin habarlaǵanbyz.
Bul jaǵdaıǵa baılanysty Qarasaı aýdanynda jergilikti aýqymdaǵy tótenshe jaǵdaı jarııalandy.
