Almatyda jol jumystary kezinde tekserilgen materıaldardyń úshten biri talapqa saı emes
ALMATY. KAZINFORM — Almatyda jol jumystary kezinde alynǵan materıaldardyń 32%-y sapa talaptaryna saı kelmedi. Merdigerler joldy óz esebinen qaıta jóndeýge májbúr bolǵan.
2025 jyly Qalalyq mobıldik basqarmasymen jáne qalanyń segiz aýdanynyń ákimdigimen jasalǵan kelisimsharttar aıasynda 509 ınspektsııalyq tekserý júrgizilip, sonyń barysynda 1 385-ten astam jol-qurylys materıaldarynyń úlgileri iriktelip, synaqtan ótkizildi.
Jol aktıvteri sapasynyń ulttyq ortalyǵynyń Almatydaǵy bólimshesiniń basshysy Máýlen Álipovtiń aıtýynsha, synaq nátıjesi boıynsha 447 úlgi normatıvtik-tehnıkalyq talapqa saı kelmegen. Tekserý barysynda 154 quqyq buzýshylyq anyqtalyp, olar boıynsha tıisti is-sharalar qabyldandy. 2022 jyly jol qurylys materıaldaryn tekserý barysynda talapqa saı kelmeý deńgeıi 50% bolsa, osy jyly — 32%.
– Bizdiń negizgi mindetimiz – sapasyz istelgen jumysty qabyldap, aqysyn tóleýge jol bermeý. Saraptama qorytyndylarynyń nátıjesinde merdiger uıymdar óz qarajaty esebinen shamamen 100 mln teńgeniń jumysyn qaıta oryndady, – dedi Máýlen Álipov Óńirlik kommýnıkatsııalar qyzmetinde ótken brıfıngte.
Sondaı-aq ol tekserýdiń sońyna qaraı Almatynyń qala qurylysy baqylaý basqarmasyna 7 ótinish joldanǵanyn, bir merdiger uıymǵa 1,7 mln teńge kóleminde aıyppul salynǵanyn da habarlady.
Ortasha jóndeý jobalaryna saraptama júrgizýge erekshe nazar aýdaryldy. 2025 jyly Jol aktıvteri sapasynyń ulttyq ortalyǵy qaladaǵy 300-den astam kósheni qamtıtyn 72 jobaǵa saraptama júrgizdi. Saraptama tehnıkalyq qujattamanyń negizdiligin, durystyǵyn baǵalaýdy qamtıdy.
Almatyda kóshe-jol jelisin dıagnostıkalaý jumysy da qyzý júrip jatyr. Bıyl osy zamanǵy jyljymaly jol zerthanasynyń kómegimen 839 shaqyrym kóshede aspaptyq dıagnostıka júrgizildi. Keler jyly taǵy 2 257 shaqyrym jol jelisin tekserý josparlanyp otyr.
Sondaı-aq qalada asfaltbeton jabyndaryn tóseýdiń jańa tásilderi qoldanyla bastady. Jol tóseminiń joǵary temperatýra men júktemege tózimdiligin arttyrý maqsatynda polımerlik qospalary bar eksperımenttik qospalar paıdalanylyp, ǵylymı qaýymdastyqtyń qatysýymen gıbrıdti asfaltbeton quramdaryn ázirleý jumysy júrgizilip jatyr.
Eske salaıyq, Almatyda 2026 jyly 250 shaqyrym jolǵa ortasha jóndeý júrgizý josparlanǵan.
Buǵan qosa, 70 shaqyrym jańa jol salý kózdelip otyr.