Almatyda jol jóndeý kezinde orta eseppen 3% jıektas aýystyrylady

ALMATY. KAZINFORM – Almatyda jol jóndeý jumystary bastalady. Osyǵan baılanysty qalalyq mobıldilik basqarmasy basshysynyń orynbasary Asan Bostanov jıektastardy aýystyrý máselesine qatysty túsinikteme berdi. 

1 maýsymnan bastap qalada ortasha jol jóndeý jumystary bastalady. Bıyl jalpy uzyndyǵy 300 shaqyrym bolatyn 367 kóshe jóndeýden ótpek. 

Sonymen qatar Raıymbek batyr jáne Jeltoqsan kósheleri boıynda BRT jelilerin salý jalǵasyp jatyr. 

– Jıektas máselesine jeke toqtalǵym keledi – bul taqyryp árdaıym turǵyndardy alańdatady. Ortasha jóndeý barysynda da, BRT jelisin salý kezinde de jıektastardy ishinara aýystyrý qarastyrylǵan. Bul tehnologııalyq turǵydan qajet qadam. Jalpy alǵanda, granıt jıektastar uzaq merzimge shydaıdy, alaıda kólik qozǵalysy qarqyndy qalada olar jol-kólik oqıǵasy nemese aýyr tehnıkanyń soǵylýy saldarynan jıi zaqymdanady. Sondyqtan jańa asfalt tóseý aldynda jıektastar tegisteledi, bıiktigi retteledi. Synbaǵan, jaramdy jıektastar qaıta qoldanylady. Al syzat, jaryq, mehanıkalyq zaqym nemese standarttan aýytqý bar elementter ǵana aýystyrylady. Ortasha jóndeý kezinde qala boıynsha orta eseppen jıektastardyń 3-5 paıyzy ǵana jańartylady, - dedi Asan Bostanov.

Onyń aıtýynsha, BRT jobalary aıasynda merdiger uıymdar 7 jyldyq kepildik mindettemelerdi oryndaıdy. Olar jol tóseminiń, jaıaý júrginshiler aımaǵy men jıektastardyń sapasyna tolyq jaýap beredi.

– Raıymbek batyr dańǵyly boıyndaǵy BRT jelisin salý kezinde joldyń geometrııalyq parametrleri túzetiledi – keıbir bólikteri keńeıtilip, keıbiri tarylady. Sondaı-aq, qoǵamdyq kólik aıaldamalary mańynda qaýipsizdik aralshalary ornatylady. Bul ózgerister jaǵdaıyna qaramastan qazirgi granıt jıektastardy alyp tastaýdy talap etedi. Sol kezde barlyq jıektas suryptalady. Aqaýy joq, qaıta paıdalanýǵa jaramdy tastar tegistelip, qaıta ornatylady, - dedi qalalyq mobıldilik basqarmasynyń orynbasary.

Spıkerdiń sózinshe, qurylys-montaj jumystary bastalmaı turyp, tehnıkalyq jáne avtorlyq qadaǵalaý tarapynan dańǵyl boıyndaǵy jıektastarǵa vızýaldy tekserý júrgizildi. 

– Sonyń nátıjesinde bıiktigi men sapasy talapqa saı kelmeıtin, zaqymdanǵan jáne pishini ózgergen bólikter anyqtalyp, olardy aýystyrý kózdelip otyr, - dedi ol.

Eske salaıyq, Raıymbek dańǵylynda BRT qurylysy sáýir aıynda bastalǵan bolatyn.