Almatyda jol jabyny opyrylyp, 13 avtokólik zaqymdandy

ALMATY. KAZINFORM — Qalalyq ákimdik Áýezov aýdany Amanjol kóshesindegi jol ne sebepti opyrylǵanyna qatysty túsinikteme berdi. 

Áýezov aýdany ákimdigi apparatynyń málimetinshe, «Spetsstroı Grýpp LTD» JShS buǵan deıin Amanjol kóshesinde taratý jelileri jobasyn aıasynda aýyzsý jáne káriz ınjenerlik jelilerin júrgizý jumystaryn tolyq kólemde aıaqtaǵan. Asfaltbeton jamylǵysyn qalpyna keltirý ýaqytsha keıinge qaldyryldy. Bul «QazaqGaz» AQ tapsyrysymen 300 mm dıametrli bolat gaz qubyryn tartý josparyna baılanysty qabyldanǵan sheshim edi. Jol tósemin qaıta qazýdan jáne turǵyndarǵa qolaısyzdyq týǵyzýdan saqtaný úshin qalpyna keltirý jumystary gaz qubyry tóselgennen keıin jasalýǵa tıis edi. Alaıda aýdannyń jaýyn sýy qoldanystaǵy aryq júıesi arqyly osy kóshege jınalyp, jol tósemine túsetin salmaqty arttyrǵan. Buǵan qosa, ınjenerlik jelilerdi alty metrge deıingi tereńdikte júrgizý topyraq negizin jumsartty.

— Osy jaǵdaıǵa jáne qatty nóserdiń áseri joldyń shógýine jáne jabynnyń búlinýine ákeldi. Sonyń saldarynan 2025 jylǵy 16 qyrkúıekte jol jabynynyń opyrylyp, 13 avtokólik zaqymdandy. Qazirgi ýaqytta Amanjol kóshesi jabyldy. Tańerteńnen bastap kólikterdi evakýatsııalaý, topyraqty shyǵarý jáne joldy tolyq tazartqanǵa deıin ballast tóseý jumystary bastalady. Sonymen qatar merdiger uıym zaqymdanǵan avtokólikterdiń ıelerine keltirilgen shyǵyndy tolyq óteıdi. Másele Almaty qalasy ákimdiginiń baqylaýynda, — dep jazdy Almaty qalasy ákiminiń kommýnıkatsııa jáne BAQ-pen jumys boıynsha keńesshisi Ilzat Akchýrın Telegram-arnasyndaǵy paraqshasynda.

Budan buryn habarlanǵandaı, Almatyda eń kóne perzenthananyń ornynda jańa bosandyrý ortalyǵy salynady.