Almatyda jol opyrylyp, plıtalar urlanǵan: aýdan ákimderi qatań sógis aldy
ASTANA. KAZINFORM – Almaty ákimi Darhan Satybaldy jol tóseminiń shógýi jáne jekelegen ýchaskelerde jıektastyń negizsiz aýystyrylýyna baılanysty Áýezov jáne Medeý aýdandarynyń ákimderine qatań sógis jarııalady, dep habarlaıdy qalalyq ákimdiktiń baspasóz qyzmeti.
Qala basshysynyń tapsyrmasymen Amanjol jáne ıAssaýı kóshelerindegi asfalttyń shógýi, Ermensaı shaǵynaýdanynda transheıalardyń shaıylýy, sondaı-aq Bostandyq aýdanyndaǵy Úlken Almaty ózeniniń jaǵalaýynan granıt plıtalardyń urlanýyna qatysty qyzmettik tergeý bastaldy.
Áýezov aýdanynda oryn alǵan nóser kezinde Amanjol kóshesinde jol tósemi shógip, 13 avtokólik zaqymdandy. Bul ýchaskedegi sýmen jabdyqtaý jáne káriz jelilerin tartý jumystaryn «Spetsstroı Grýpp LTD» JShS oryndaǵan.
Sondaı-aq ıAssaýı kóshesinde «Spetskommýnstroı» JShS salǵan káriz jelisi aýmaǵynda asfalt opyrylǵan. Osy olqylyqtar úshin Áýezov aýdany ákimine qatań sógis berildi.
Bostandyq aýdanynda ákim bolmaǵan ýaqytta onyń turǵyn úı-kommýnaldyq sharýashylyǵy jáne abattandyrý salasyna jetekshilik etetin orynbasary qyzmetinen bosatyldy. Ol Ermensaı shaǵynaýdanyndaǵy transheıalardyń shaıylýyna jáne ál-Farabı dańǵyly men Jarokov kóshesindegi jerasty ótkelinde granıt plıtalardy negizsiz aýystyrýǵa baqylaý júrgizbegen.
Merdiger uıymdardy qadaǵalaýda kemshilik jibergeni úshin Medeý aýdany ákimine de qatań sógis jarııalandy. Ýálıhanov býlvaryndaǵy jıektastyń zańsyz alynyp, plıtalardyń oblystaǵy jeke úıge jetkizilýi qoǵamda úlken narazylyq týǵyzǵan bolatyn. Bul derek boıynsha qylmystyq is qozǵaldy.
Sonymen qatar, qala ákimi Úlken Almaty ózeniniń arnasyn qaıta jańǵyrtý jobasyn oryndap jatqan «Pavlodar ózen porty» AQ jumysyna qyzmettik tekseris júrgizýdi tapsyrdy. Osyǵan baılanysty Ekologııa basqarmasynyń basshysyna sógis berildi. Al Polıtsııa departamentiniń bastyǵyna ózen jaǵalaýynan granıt plıtalardyń urlanýyna qatysty qylmystyq istiń tergeý nátıjeleri týraly esep berýdi mindettedi.
Darhan Satybaldy anyqtalǵan kemshilikterdi qysqa merzimde joıýdy tapsyrdy. Sondaı-aq GASK-qa merdiger uıymdar men tehnıkalyq qadaǵalaý qyzmetiniń jumysyn qaıta tekserý mindetteldi. Eger kemshilikter rastalsa, qatań shara qoldanyp, aıyppul salynady.
Aıta keteıik, Almatyda jańbyr kezinde 13 úıdi sý basyp qalyp, otbasylar qonaqúıge ornalastyryldy.