Almatyda jol qozǵalysyn rettep turǵan polıtsııa qyzmetkerin kólik qaǵyp ketti

ALMATY. KAZINFORM – Almaty qalasynda kóshe qıylysynda jol qozǵalysyn rettep turǵan polıtsııa qyzmetkerin jeńil kólik qaǵyp ketti.

Qalalyq Polıtsııa departamentiniń málimetinshe, oqıǵa 7 qarasha kúni saǵat 15:10 shamasynda Jeltoqsan jáne Sátbaev kósheleriniń qıylysynda bolǵan.

– Toyota markaly avtokóliktiń júrgizýshisi Jeltoqsan dańǵylymen ońtústik baǵytta qozǵalyp kele jatyp, Sátbaev kóshesine solǵa burylǵanda qozǵalysty rettep turǵan polıtsııa qyzmetkerin qaǵyp ketken. Jol-kólik oqıǵasy saldarynan polıtsııanyń aǵa leıtenanty dene jaraqatyn aldy, - dep habarlady departamentten.

Oqıǵanyń mán-jaıyn Bostandyq aýdandyq polıtsııa basqarmasy anyqtap jatyr.

Eske salaıyq, buǵan deıin polıtsııa qyzmetkerin kóligimen súırep ketken júrgizýshi 7 jylǵa sottaldy.