Almaty joldarynda qozǵalys erejesinde joq belgi paıda boldy
Almatyda Tilendıev kóshesi boıymen Abaı dańǵylynan Tóle bı kóshesine deıin jolaqtardy syzý jumystary júrgizilip jatyr. Eksperımenttik tártipte rettelmeıtin jaıaý júrginshiler ótkelderiniń aldynda apatty jaǵdaıdy boldyrmaý úshin zıgzag tańbasy qoldanyldy, dep habarlaıdy Kazinform.
Almaty ákimdiginiń málimetinshe, mundaı jolaq QR Jol qozǵalysy erejelerinde kórsetilmegen. Jolaq kólik júrgizýshilerdiń jaıaý júrginshiler ótkeline jaqyndap kele jatqanyn bildirý úshin qoldanylady.
«Sonymen qatar mundaı sary jolaq bul ýchaskede basyp ozýǵa, keri júrýge, osy aımaqta qaıta burylýǵa bolmaıtyny týraly qosymsha dabyl retinde qyzmet etedi. Óıtkeni ol qaýipsiz bolýy jáne jol qozǵalysy qatysýshylardyń jaqsy kórýine múmkindik bar. Kórsetilgen eksperıment oń nátıje bergen jaǵdaıda rettelmeıtin jaıaý júrginshiler ótkelderi aýdanynda zıgzag tańbasyn qoldaný boıynsha jumystar jalǵastyrylatyn bolady», - dep habarlady ákimdikten.
Aıta keteıik, eń tanymal zıgzag tańbasy 1970 jyldardan bastap aldymen Ulybrıtanııada, sodan keıin basqa elderde qoldanyla bastady. Joldardaǵy erekshe jolaqtar basqa jol belgilerine qaraǵanda tıimdi bolyp shyqty jáne jaıaý júrginshiler men kólik ıeleriniń qaýipsizdigin arttyrýǵa kómektesti.
