Almatyda jol-kólik oqıǵasynan jaıaý júrginshi mert boldy

ALMATY. KAZINFORM – Almatyda túngi ýaqytta jeńil kólikter soqtyǵysyp, saldarynan bir adam qaza tapty. Qaıǵyly oqıǵanyń beınejazbasy áleýmettik jelide tarady.

Polıtsııa departamentiniń málimetinshe, jol-kólik oqıǵasy Áýezov aýdanynda bolǵan.

— Bul jol-kólik oqıǵasy búgin tún jarymda Almatynyń Áýezov aýdanynda bolǵan. Saın kóshesimen soltústik baǵytta kele jatqan «BMV» markaly kóliktiń júrgizýshisi sol jaq qatarda turǵan «Nıssan» markaly kóligin soǵyp, eki jaıaý júrginshini qaǵyp ketken. Oqıǵa saldarynan jaıaý júrginshilerdiń biri — 48 jastaǵy er adam oqıǵa ornynda kóz jumdy. Adam ólimine ákep soqtyrǵan jol-kólik oqıǵasy boıynsha qylmystyq is qozǵaldy. Saraptamalar taǵaıyndaldy, — dep habarlaıdy qalalyq PD baspasóz qyzmeti.

Eske salaıyq, 16 shilde kúni Almatyda taǵy bir avtobýs jol-kólik oqıǵasyna ushyrap, 9 adam zardap shekken bolatyn.