Almatyda jol erejesin buzǵan júrgizýshi 15 táýlikke qamaýǵa alyndy

ALMATY. KAZINFORM — Almaty qalasynda polıtsııa qyzmetkerleri jol qozǵalysy erejelerin birneshe ret óreskel buzǵan Mercedes kóliginiń júrgizýshisin anyqtap, jaýapqa tartty.

Polıtsııa departamentiniń málimetinshe, quqyq buzýshy ákimshilik kodekstiń jeti baby boıynsha jaýapkershilikke tartyldy.

— Ol manevr jasaý erejelerin buzǵan, kólikti júrgizýshi kýáliginsiz basqarǵan, apatty jaǵdaı týǵyzǵan, kólik quraldaryn paıdalaný erejelerin saqtamaǵan, kólikti basqarý kezinde uıaly telefon paıdalanǵan jáne pırotehnıkalyq buıymdardy zańsyz qoldanǵan. Bul áreketterdiń nátıjesinde jalpy somasy 95 aılyq eseptik kórsetkishti (373 540 teńge) quraıtyn aıyppul salyndy, – dep atap ótti Almaty qalalyq polıtsııa departamenti jergilikti polıtsııa qyzmeti basqarmasy bastyǵynyń orynbasary Tımýr Noǵaıbaev.

Sonymen qatar tártip buzýshy usaq buzaqylyq jasaǵany úshin de jaýapqa tartyldy. Almaty qalasynyń mamandandyrylǵan aýdanaralyq ákimshilik sotynyń sheshimimen ol 15 táýlikke qamaýǵa alyndy. Mercedes kóligi arnaıy aıyppul turaǵyna qoıyldy.

Almaty polıtsııasy azamattarǵa jol erejelerin qatań saqtaýdy jáne árbir jol qozǵalysyna qatysýshynyń jeke jaýapkershiligin kúsheıtýdi eskertedi.

Osyǵan deıin Almatyda 33 jol apaty bolǵanyn jazǵan edik.