Almatyda jol erejesin buzǵan tanymal bloger jazalandy

ALMATY. KAZINFORM — Daricorn atymen tanymal bloger Darıǵa Nurkeeva jol erejesin óreskel buzǵan.

Ol kólik basqaryp otyrǵan beınejazbasyn áleýmettik jelidegi óz paraqshasynda jarııalaǵan. Almaty qalasynyń Polıtsııa departamenti bloger eki bap boıynsha ákimshilik jaýapkershilikke tartylǵanyn málimdedi.

— Internet keńistikti taldaý barysynda belgili bloger-qyzdyń jol-kólik erejelerin óreskel buzǵany anyqtaldy. Tergeý qorytyndysy boıynsha quqyq buzýshy QR ÁQbK-niń 595-babynyń 1-bóligi (sıgnal berý talaptaryn oryndamaý) jáne QR ÁQbK-niń 606-babynyń 1-bóligi (apattyq jaǵdaı týǵyzý) boıynsha ákimshilik jaýapkershilikke tartyldy. Mundaı áreketter jaı ǵana jaýapsyzdyq emes, ol basqalardyń ómiri men densaýlyǵyna qasaqana qaýip tóndirý. Munyń bári ınternettegi laık pen qaralym úshin jasalady. Tanymaldylyq deńgeıi, oqyrmandardyń sany jaýapkershilikten bosatpaıdy. Zań — bárine birdeı, — dep habarlady polıtsııa.

Eske salaıyq, buǵan deıin Darıǵa Nurkeevaǵa qatysty ózge daý bolǵan edi. Oǵan baılanysty balalar ombýdsmeni pikir bildirdi.