Almatyda jol boıyndaǵy zańsyz nysan súrilip jatyr

Qala qurylysyn baqylaý basqarmasynyń málimetinshe, 3-shaǵynaýdan, 16A mekenjaıynda ornalasqan ǵımaratty súrý jumystary bastaldy. Buǵan deıin júrgizilgen tekserý barysynda ruqsat qujattarynyń bolmaýyna baılanysty menshik ıesi «Aı» JShS ákimshilik jaýapkershilikke tartylyp, zańbuzýshylyqtardy joıý týraly nusqama berilgen. Alaıda nusqama oryndalmaǵandyqtan, materıaldar sotqa joldandy.

— Almaty qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń qaýlysymen menshik ıesi ákimshilik jaýapkershilikke tartylyp, zańsyz salynǵan qurylysty májbúrlep buzý týraly sheshim qabyldandy. Nysandy súrý jumystary qalalyq Ádilet departamentiniń sot oryndaýshylarynyń qatysýymen bastaldy, — dep habarlady vedomstvodan.

Eske salaıyq, buǵan deıin Almatyda zańsyz salynǵan «Jetisý-Semıreche» bazaryn buzý jumystary bastaldy. Túrksib aýdanynyń Qaırat shaǵynaýdanynda ornalasqan bazardyń jalpy aýmaǵy 56 myń sharshy metrden asady. Tekserý barysynda ony «Statýs Construction» JShS ruqsat qujattarynsyz salǵany anyqtalǵan.