Almatyda jol apatynan úsh adam qaza tapty: oqıǵanyń mán-jaıy belgili boldy
ALMATY. KAZINFORM – Almaty qalasynyń polıtsııa departamenti 21 naýryz kúni ál-Farabı dańǵylynda bolǵan jol-kólik oqıǵasynyń mán-jaıyn jarııalady.
Qaıǵyly oqıǵa 21 naýryzǵa qaraǵan túni Medeý aýdanynda bolǵan. Áleýmettik jelilerde apat ornynan túsirilgen beınejazba tarady.
Polıtsııanyń málimetinshe, ZEEKR kóliginiń júrgizýshisi dańǵyl boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan.
Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Kúdikti túrli dene jaraqatyn alyp, medıtsınalyq mekemege jetkizildi. Qazirgi ýaqytta ol kúzetpen aýrýhanada jatyr. Jaǵdaıy turaqtalǵannan keıin ýaqytsha ustaý ızolıatoryna qamalady.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy. Bul bap boıynsha 10 jylǵa deıin bas bostandyǵynan aıyrý jazasy qarastyrylǵan.
Almaty qalalyq polıtsııa departamenti bastyǵynyń orynbasary Rýstam Sháribaevtyń aıtýynsha, oqıǵaǵa qatysy bar barlyq tulǵalar anyqtalǵan.
– Árqaısysyna qatysty ákimshilik is qozǵaldy, materıaldar sotqa joldandy. Kólikter aıyppul turaǵyna qoıyldy. Eshkim jaýapkershilikten qutylmaıdy, – dedi ol.
Іs materıaldaryna beınebaqylaý kameralarynyń barlyq jazbasy tirkelgen. Qazir olar tolyq zerttelip jatyr.
Sondaı-aq júrgizýshige alkogoldik mas kúıde bolǵan-bolmaǵanyn anyqtaý úshin medıtsınalyq saraptama taǵaıyndaldy. Budan bólek, jol qozǵalysy erejelerin buzýdyń basqa da derekteri boıynsha ákimshilik is qozǵalǵan.
Tergeý Almaty qalasy polıtsııasynyń erekshe baqylaýynda.
Polıtsııa azamattardy jalǵan aqparat taratpaýǵa jáne tek resmı derekkózderge súıenýge shaqyrdy.
Aıta keteıik, buǵan deıin Astana – Qaraǵandy – Almaty tasjolynda bolǵan jol apatynan úsh adam qaza tapqan edi.
