Almatyda jol apatynan eki adam mert boldy
ALMATY. KAZINFORM — Almatyda eki kólik soqtyǵysyp, saldarynan eki adam qaza tapty jáne taǵy eki adam jaraqat aldy.
Qalalyq polıtsııa departamentiniń málimetinshe, jol-kólik oqıǵasy búgin saǵat 03:10–da Alataý aýdanynda, Rysqulov dańǵyly men Sháripov kóshesiniń qıylysynda bolǵan.
Aldyn ala boljam boıynsha Rysqulov dańǵyly boıymen batys baǵytta kele jatqan Suzuki markaly avtokóligi Sháripov kóshesiniń qıylysynda keri burylmaq bolyp, shyǵys baǵytta kele jatqan Mercedes avtokóligimen soqtyǵysqan.
— Alǵan jaraqattardan Suzuki kóliginiń júrgizýshisi men onyń bir jolaýshysy oqıǵa ornynda kóz jumdy. Taǵy bir jolaýshy men Mercedes júrgizýshisi dene jaraqattarymen medıtsınalyq mekemege jetkizildi, — dep habarlady departamentten.
Eki adamnyń ólimine alyp kelgen jol-kólik oqıǵasy deregi boıynsha Almaty qalasy polıtsııa departamentiniń Tergeý basqarmasy qylmystyq is qozǵady. Apattyń mán-jaıy anyqtalady.
Eske salaıyq, Taldyqorǵanda jedel járdem kóligi jol apatyna ushyrady.
