Túrkııadaǵy ınflıatsııa birtindep baıaýlap keledi

ASTANA. KAZINFORM — Túrkııa statıstıka ınstıtýty (TÜİK) qarasha aıyndaǵy ınflıatsııanyń resmı derekterin jarııalady, onda baǵa ósiminiń odan ári baıaýlaǵany kórsetilgen, dep habarlaıdy Kazinform menshikti tilshisi. 

TÜIK resmı esebine sáıkes, tutyný baǵalary qarasha aıynda nebári 0,87%-ǵa ósti, bul aldyńǵy aıdaǵy 2,55%-dyq kórsetkishten aıtarlyqtaı tómen.

Aı saıynǵy birqalypty ósimnen basqa jyldyq ınflıatsııanyń tómendeýi jalǵasty. Qarasha aıynda onyń kórsetkishi 31,07%-dy qurady, bul sońǵy aılardaǵy turaqty tómendeý úrdisin rastap otyr.

Sarapshylar Túrkııadaǵy ınflıatsııa dınamıkasy aqsha-nesıe saıasatyn qatańdatý men valıýta baǵamyn turaqtandyrýdyń úılesimin kórsetetinin atap ótti. Inflıatsııalyq belsendiliktiń baıaýlaýy eldiń ekonomıkalyq retteýshilerine manevr jasaýǵa qosymsha múmkindik berýi múmkin. Alaıda sarapshylar bul progresti saqtaý fıskaldyq saıasatta saqtyq tanytýdy jáne qarjy naryqtaryna senimdi nyǵaıtý úshin qosymsha qadamdar jasaýdy talap etetinin eskertti.

TÜIK-tiń qarasha aıyndaǵy derekteri Túrkııanyń ekonomıkalyq ahýalyn jáne jyl sońyndaǵy kútýlerdi baǵalaý úshin mańyzdy kórsetkishke aınalyp otyr.

Qarasha aıynyń basynda Túrkııanyń Ortalyq banki ınflıatsııa qarqyny boıynsha jańartylǵan boljamyn jarııalap, aldaǵy jyldary baǵa ósiminiń birtindep tómendeıtinin belgiledi. 

Buǵan deıin Túrkııadaǵy ınflıatsııa birtindep baıaýlap otyrǵanyn, biraq baǵa áli ósip jatqanyn jazǵan bolatynbyz. 

Sondaı-aq túrik lırasy óz qunynyń 97%-yn joǵaltqanyn habarladyq.