Almatyda jol apaty saldarynan 653 abonent gazsyz qaldy
ALMATY. KAZINFORM — Búgin, 6 qarashada Almatynyń Túrksib aýdanynda Toyota Land Cruiser Prado kóligi qatysqan jol apaty saldarynan gaz qubyry zaqymdandy.
QazaqGaz Aimaq AQ málimetinshe, soqqydan shamamen 10 metr qubyr bóligi búlinip, alty tireý deformatsııalanǵan. Saldarynan gaz shyǵyp, qaýipsizdik maqsatynda gaz berý ýaqytsha toqtatyldy.
Oqıǵa saldarynan 653 abonent, onyń ishinde 646 jeke úı, 3 shaǵyn bıznes nysany jáne 4 óndiristik kásiporyn gazsyz qaldy.
Kompanııanyń apattyq qyzmeti jedel túrde oqıǵa ornyna jetip shyǵyp jatqan gazdy toqtatty. Qazir qalpyna keltirý jumystary júrgizilip jatyr. Aýmaq qorshalyp, táýlik boıy baqylaýda tur.
— Barlyq kúsh-jiger gaz berýdi qysqa merzimde qalpyna keltirýge jáne tutynýshylarǵa qolaısyzdyqty azaıtýǵa baǵyttalǵan, — dep habarlady jergilikti gaz qyzmeti.
Oqıǵa týraly aqparat jol polıtsııasyna joldandy. Júrgizýshige qatysty jaýapkershilik sharalaryn qoldaný úshin resmı ótinish berilgen.
Eske salaıyq, buǵan deıin Almatyda Buqar Jyraý men Baızaqov kósheleriniń qıylysynda gaz qubyry jarylyp, eki adam zardap shekkenin habarlaǵanbyz.
Keıinirek apattyń aldyn ala sebebi belgili boldy.