Almatyda joǵalyp ketken jasóspirim tabyldy
ALMATY. KAZINFORM – Almatylyq polıtseıler 13 naýryzda joǵalyp ketken jasóspirimdi tapty.
Buǵan deıin almatylyq eriktiler áleýmettik jelide Ramazan Qaldarov esimdi jasóspirimge izdeý salynǵanyn habarlaǵan edi. Ol 13 naýryz kúni shamamen keshki saǵat 18:00-de úıinen shyǵyp, qaıta oralmaǵan. Ústinde qara kúrtke, aıaǵynda qara shalbar men qara krossovka bolǵany jazylǵan.
Almaty qalalyq polıtsııa departamenti Ramazan Qaldarovty 500-den astam adam izdegenin habarlady. Jedel-izdestirý is-sharalaryna jedel ýákilder, ıývenaldy polıtsııa ınspektorlary, ýchaskelik ınspektorlar, sondaı-aq eriktiler men muǵalimder qatysqan.
«Eń aldymen saýda jáne oıyn-saýyq ortalyqtary men jetkinshektiń jaqyn ortasy tekserildi. Sonymen qatar Almaty mańyndaǵy bazarlardyń birinde jas jigittiń qańǵyp júrgeni týraly aqparat tekserildi. Іzdestirý sharalarynyń nátıjesinde jasóspirim aman-esen tabylyp, ata-anasyna qaıtaryldy. Oqıǵanyń basqa da mán-jaılary anyqtalýda», - dep habarlady qalalyq polıtsııa departamentiniń baspasóz qyzmeti.
