Almatyda joǵalyp ketken top-menedjerdiń denesi tabyldy: polıtseıler kúdiktini ustady
ALMATY. KAZINFORM – Almatyda iz-túzsiz joǵalyp ketken 42 jastaǵy er adamnyń máıiti Іle aýdanyndaǵy Ótegen batyr aýylynyń shetinen tabyldy.
Buǵan deıin Lider.kz uıymynyń eriktileri áleýmettik jelide 42 jastaǵy Ermek Jaqypjanovtyń joǵalyp ketkeni týraly habarlandyrý jarııalaǵan bolatyn.
Ol 9 qazan kúni tańerteń Masanshy kóshesiniń boıyndaǵy úıinen Hyundai Genesis kóligimen shyǵyp ketip, qaıtyp oralmaǵan.
Almaty oblystyq polıtsııa departamenti 10 qazanda Іle aýdany Ótegen batyr aýylynyń shetinde 42 jastaǵy er adamnyń denesi tabylǵanyn málimdedi.
«Polıtseıler adam óltirý faktisi boıynsha qylmystyq is qozǵady. Jedel izdestirý sharalary barysynda Qaraǵandy oblysynyń krımınaldyq polıtsııa qyzmetkerleri 24 jastaǵy kúdiktini anyqtap, ýaqytsha ustaý ızolıatoryna qamady», - dep habarlady oblystyq polıtsııa departamentinen.
Qazirgi ýaqytta qylmystyń barlyq mán-jaıy men sebepterin obektıvti zertteýge baǵyttalǵan barlyq qajetti tergeý áreketteri júrgizilip jatyr.
Aıta keteıik, marqumnyń áleýmettik jelilerdegi profılinde onyń Lenovo kompanııasynyń GR dırektory ekeni kórsetilgen.
