Almatyda jyljymaıtyn múlik satyp alýdan buryn neni bilý kerek
ALMATY. KAZINFORM — Byltyr jyl basynan beri sottarǵa zańnama men qurylys normalarynyń talabyn buzǵany úshin 230 talap aryz joldandy. Onyń ishinde 96 nysan tolyq nemese jartylaı buzýdy talap etedi.
Almaty ákimdiginiń málimetinshe, buzýǵa jatatyn nysandardyń ishinde turǵyn úı keshenderi men taýnhaýstar bar. Mindetine salǵyrt qaraǵan qurylys salýshylar ondaǵy birqatar páterdi satqan. Kóbinese qurylys salýshylar qoldanystaǵy zańnamaǵa sáıkes úleskerlerdiń qarajatyn tartý úshin 3 qabatqa deıingi turǵyn úılerge ruqsat talap etilmeıtindigin paıdalanady. Bul kóbinese bastapqy jyljymaıtyn múlik naryǵyndaǵy kúmándi mámilelerge yqpal etedi. Bul jaǵdaıda tekserý men sot talqylaýyn júrgizýdiń quqyqtyq normasynda belgilengen rásimderiniń uzaqtyǵy mindetine salǵyrt qaraǵan jaýapsyz qurylys salýshyǵa zańsyz nysanda páterler men turǵyn emes úı-jaılardyń belgili bir sanyn satýǵa múmkindik beredi.
Almatynyń Qala qurylysyn baqylaý basqarmasy júıeli túrde buqaralyq aqparat quraldary qala turǵyndaryn qulaqtandyrý úshin jyljymaıtyn múlik satyp alýǵa usynylmaıtyn turǵyn úı keshenderi týraly aqparat jarııalap otyrady. https://kaz.inform.kz/news/almatida-satip-aluga-usinilmaytin-uyler-tzm-shikti-af317f/
«Alaıda jyljymaıtyn múlik naryǵyndaǵy mámiledegi shyǵyndardy boldyrmaý úshin qurylys salýshydan tolyq ruqsat qujattaryn talap etý nemese Qala qurylysyn baqylaý basqarmasynyń +7 705 89 66 000 WhatsApp anyqtamalyq arnasy arqyly tıisti qujattarynyń bar-joǵy týraly senimdi aqparat alý qajet ekenin umytpaǵan jón. Qala qurylysy jáne ýrbanıstıka basqarmasynan qurylys salýshydan úleskerlerdiń qarajatyn tartýǵa ruqsattyń bolýy týraly aqparat alýǵa bolady»,- dep atap ótti ákimdikten.
Eger tutynýshy jyljymaıtyn múlikti zańsyz nysanda satyp alsa, qurylys salýshy qarajatty qaıtarýdan bas tartqan jaǵdaıda Almaty qalasy boıynsha Ekonomıkalyq tergeý departamentine jáne quqyq qorǵaý organdaryna ótinishpen júginýi kerek.
Basqarma sonymen qatar osy nysandardyń birqatary nelikten jartylaı salynǵanyn jáne olardyń qurylysy bastapqy kezeńde qandaı sebeppen toqtatylmaǵanyn túsindirdi.
«Qazirgi tańda sáýlet-qurylys baqylaý organdary qurylys nysandaryna kedergisiz barý quqyǵynan aıyryldy. Jospardan tys tekserýler QR Kásipkerlik kodeksimen reglamentteledi jáne tek resmı ótinish negizinde júrgiziledi. Osylaısha, zańsyz qurylys faktisin tirkeý jáne qurylys salýshyǵa shara qoldaný úshin jospardan tys tekserý júrgizý qajet», - delingen habarlamada.
Resmı ótinish alǵannan keıin materıaldardy jınaýdyń jáne tekserýdi QR BP Quqyqtyq statıstıka jáne arnaıy esepke alý komıtetiniń basqarmasynda tirkeý protsesi júredi. Tekserý qorytyndysy boıynsha buzýshylyq anyqtalǵan jaǵdaıda, olardy joıýǵa jáne qurylys-montaj jumystaryn toqtata turýǵa nusqama beriledi.
Nusqama merzimi ótkennen keıin tekserý sýbektisi nusqama talaptarynyń oryndalýy týraly aqparat berýge tıis. Eger buzýshylyq joıylmasa, materıaldar jumystardy toqtata turý jáne ákimshilik jaýapkershilikke tartý týraly protsestik sheshim qabyldaý úshin mamandandyrylǵan aýdanaralyq ákimshilik sotqa jiberiledi. Sodan keıin nysandy buzý týraly azamattyq tártipte sotqa talap aryz jiberiledi. Sot úderisteri nysannyń kólemine jáne istiń kúrdeliligine baılanysty birneshe aıǵa sozylady.
Aıta ketý kerek, zańsyz qurylys máselesi Almaty ákimi Erbolat Dosaevtyń erekshe baqylaýynda. Qala basshysynyń tapsyrmasymen megapolıs boıynsha talap qoıý qyzmetiniń nátıjesine sáıkes, ótken jyldan bastap 35 zańsyz nysan tolyq nemese jartylaı buzyldy. Onyń ishinde bıznes ortalyqtar, meıramhanalar, qosalqy ǵımarattar men avtoservıster, sondaı-aq «Mechta» jáne KHAN sııaqty iri turǵyn úı keshenderi bar.
