Almatyda jylý júıesin tsıfrlandyrý 2026 jylǵa deıin aıaqtalady
ALMATY. KAZINFORM – Almaty ákimi Erbolat Dosaev Túrksib aýdanynyń turǵyndarymen kezdesýi kezinde aldaǵy ýaqytta jylý úshin tólemderdi onlaın baqylaýǵa bolatynyn málimdedi.
Erbolat Dosaevtyń aıtýynsha, qazirgi tańda kóp qabatty úılerde barlyq páterge ortaq jylý esepteý quraldary ornatylǵan. Jylý páterdiń sharshy metrine baılanysty esepteledi, sondyqtan tólem túbirtekteri turǵyndarǵa keshigip jiberiledi.
– Qazir eseptegish quraldar úılerge ortaq ornatylǵan. Osy sebepti tólem turǵyn úı sharshy metrine qaraı belgilenedi jáne keshigip esepteledi. Bıyl biz esepteý protsesterin tsıfrlandyrýdy bastadyq. Basty maqsatymyz – ár páterge jeke jylý eseptegish quraldy ornatý. Bul turǵyndarǵa qansha jylý tutynylǵanyn naqty túsinýge múmkindik beredi, – dedi qala ákimi.
Ákim sózinshe, júıeni tolyq engizý 2025–2026 jyldarǵa josparlanǵan. Osydan keıin almatylyqtar naqty tólemderdi onlaın rejıminde kóre alatyn bolady.
Eske salaıyq, buǵan deıin Almatyda sý men jylýdy tutynýdyń áleýmettik normasy engizilgenin jazǵanbyz.