Almatyda jylý júıelerin tsıfrlandyrý jumysy 2026 jyly bastalady
ALMATY. KAZINFORM — Almatyda kelesi jyly tsıfrlandyrý baǵytynda taǵy bir joba qolǵa alynady.
Jyl basynda Almatynyń eks-ákimi Erbolat Dosaev 2025–2026 jyldardyń ishinde jylý júıesin tsıfrlandyrý josparlanǵanyn aıtqan bolatyn.
Alaıda agenttik saýalyna jaýap bergen «Almaty jylý jelileri» JShS 2025 jyly bul baǵytta jumysyn júrgizilmegenin habarlady.
Kompanııa jaýabyna sáıkes, Almaty qalasynyń jylýmen jabdyqtaý júıesiniń senimdiligi men tıimdiligin, sondaı-aq usynylatyn qyzmetterdiń sapasyn arttyrý maqsatynda jylý júıelerin tolyq tsıfrlandyrý jobasyn 2026 jyly bastalady. Qazir Almaty qalasy tsıfrlandyrý basqarmasyna tıisti ótinimder jiberilgen.
Jobany iske asyrý jumysy eki kezeńge bólinedi. Birinshi — jobalaý kezeńi. Kelesi jyldyń ishinde tehnıkalyq qujattama ázirlenip, ońtaıly tsıfrlyq sheshimder tańdalady jáne beıimdeledi. Bolashaq avtomattandyrylǵan basqarý jáne monıtorıng júrgizý júıesiniń arhıtektýrasy pysyqtalady.
Odan keıingi jyldar — jobany iske asyrý kezeńi bolady. Alaıda kompanııa bul jumystardyń naqty merzimin habarlaǵan joq. Sebebi ol jobalaý sátti aıaqtalǵannan keıin bastalady. Atalǵan kezeńde ázirlengen júıelerdi tikeleı engizý bastalady.
Onyń ishinde:
— jylý júıeleriniń jaı-kúıin naqty ýaqyt rejıminde jedel baqylaý;
— yqtımal aqaýlyqtardy dıagnostıkalaý men boljaýdyń dáldigin arttyrý;
— apattyq jaǵdaılarda áreket etý men apatty joıýǵa ketetin ýaqytty azaıtý.
— Tsıfrlandyrý — zamanaýı, ıntellektýaldy jáne turaqty jylýmen jabdyqtaý júıesin qurýǵa aparatyn basty qadam. Bul jobany iske asyrýdyń jylý júıeleriniń jumysyn álemdik standarttarǵa saı keletin sapasy jaǵynan jańa deńgeıge shyǵaratynyna senimdimiz, — dep habarlady «Almaty jylý jelileri» JShS.
Eske salaıyq, buǵan deıin Almatynyń tsıfrlyq egizin ázirleý jobasy aldaǵy ýaqytta bastalatynyn jazǵanbyz. Ony Qytaı agenttigi qarjylandyrýy múmkin.