Almatyda jylý jelileriniń jartysynan astamy tozǵan
ALMATY. KAZINFORM — Almatyda 2025-2026 jyldardaǵy jylytý maýsymy qorytyndylanyp, kelesi kezeńge daıyndyq máseleleri qaraldy.
Qala ákimdiginiń málimetinshe, jylytý maýsymy jalpy alǵanda turaqty ári qalypty ótken, aıtarlyqtaı irkilis tirkelmegen.
— Apattyq qyzmetter jedel jumys istep, aqaýlardy ýaqytynda jóndedi. Sonymen qatar jelilerdegi zaqymdaný sany azaıǵan. Atap aıtqanda, jylý jelilerinde 276, sý júıesinde 434, gaz jelilerinde 153 jaǵdaı tirkeldi, — dep habarlady ákimdik.
Alaıda ınjenerlik ınfraqurylymnyń tozý deńgeıi áli de joǵary. Jylý jelileriniń 53,9%-y, elektr jelileriniń 63,3%-y, qazandyq jabdyqtarynyń 63%-dan astamy tozǵan.
Almaty ákimdigi 2026 jylǵa aýqymdy jańǵyrtý jumystary josparlanǵanyn málimdedi. Atap aıtqanda, jylý, sý jáne elektr jelilerin, sondaı-aq qazandyqtar men gaz ınfraqurylymyn jóndeý jáne jańartý kózdelgen.
— Negizgi mindet — turǵyndardy turaqty ári sapaly jylýmen qamtamasyz etý. Osyǵan baılanysty jumystarǵa baqylaýdy kúsheıtý jáne jóndeý jumystarynyń qarqynyn jedeldetý jóninde tapsyrma berildi, — delingen habarlamada.
Eske salaıyq, buǵan deıin Almatyda jylý berý 3 sáýirden bastap kezeń-kezeńimen toqtatylatynyn habarlaǵan edik.
Al onyń aldynda Almatyda jylytý maýsymy bastalǵaly 153 órt tirkelgenin jazǵanbyz.