Almatyda jylý jelilerin onlaın baqylaıtyn «aqyldy» júıe engizildi
ALMATY. KAZINFORM – Almatyda 2025-2026 jylǵy jylytý maýsymy bastaldy. Bıyl qala tarıhynda alǵash ret jylý jelileriniń jumysyn tsıfrlyq júıe arqyly onlaın rejımde baqylaý qolǵa alyndy.
Bul týraly qalalyq energetıka jáne sýmen jabdyqtaý basqarmasynyń basshysy Nurbaqyt Serikbaı aıtty. Onyń sózinshe, «Almatyteplokommýnenergo» JShS nysandarynda qysym men temperatýrany naqty ýaqyt rejıminde qadaǵalaıtyn pılottyq joba iske qosylǵan.
– Endigi ýaqytta biz apatpen kúresip qana qoımaı, olardyń aldyn ala bastaımyz. Júıe temperatýra, qysym jáne jylý tasymaldaǵyshtyń shyǵynyn tirkep, derekti dıspetcherlik ortalyqqa jiberedi. Osylaısha, aqaýdy turǵyndarǵa sezdirmeı, joıýǵa múmkindik týady, - dedi Nurbaqyt Serikbaı Óńirlik kommýnıkatsııalar qyzmetinde ótken brıfıngte.
Mamannyń aıtýynsha, jańa júıe arqyly kommýnaldyq qyzmetter kez kelgen aýytqýdy onlaın baqylap, apatty jaǵdaılardy aldyn ala anyqtaı alady. Bul qaladaǵy ınjenerlik ınfraqurylymdy «aqyldy basqarýǵa» kóshý jolyndaǵy alǵashqy qadam bolmaq.
Sonymen qatar Almatyda jylý sharýashylyǵyn jańǵyrtý jumystarynyń eń iri kezeńi de aıaqtalyp qaldy. «Almaty qalasyn damytý jol kartasy» aıasynda 17 qazandyq jóndelip, jańartyldy. Bul qaladaǵy barlyq nysandardyń shamamen 20%-y.
Jóndeý jumystary Túrksib, Medeý, Alataý jáne Jetisý aýdandarynda júrgizildi. Eskirgen jabdyqtar aýystyrylyp, basqarý júıeleri jańartyldy, jańa deaeratorlar, sorǵylar men akkýmýlıatorlyq baktar ornatyldy. Keıbir aýdandarda zamanaýı qazandyq ǵımarattary salyndy.
– Basty maqsatymyz – qala turǵyndaryn senimdi, qaýipsiz jáne tıimdi jylýmen qamtamasyz etý, - dedi basqarma basshysy.
2026 jyly taǵy 20 qazandyqty jańartý josparlanyp otyr. Al 2030 jylǵa deıin 61 nysan tolyq jańǵyrtylmaq. Sarapshylardyń baǵalaýynsha, bul sharalar jylý júıesiniń qýatyn únemdep, senimdiligin arttyryp qana qoımaı, qalanyń ekologııalyq júktemesin de azaıtady.
Eske salaıyq, buǵan deıin Almatyda 8 qazannan bastap áleýmettik nysandarǵa jylý beriletinin habarlaǵanbyz.
Jylytý maýsymyn ádettegiden erterek bastaý týraly sheshim aýa temperatýrasynyń kúrt tómendeýine baılanysty qabyldandy.