Almatyda jylý qashan óshiriletini belgili boldy

ALMATY. KAZINFORM – Almatyda 10 sáýirden bastap áleýmettik nysandar men qala turǵyndarynyń úılerinde jylý kezeń kezeńimen óshiriledi.

Almaty ákimdiginen málimetinshe,2024-2025 jyldardaǵy jylý berý maýsymy qalypty jaǵdaıda ótip jatyr. Barlyǵy 404 bilim berý nysany, 128 densaýlyq saqtaý mekemesi men 8 863 turǵyn úı ortalyqtandyrylǵan jylýmen qamtylǵan.

— Jylytý maýsymyna daıyndyq jáne ótkizý qaǵıdalaryna sáıkes, Almatyda kúntizbelik bes kún ishinde gıdrometeorologııalyq qyzmetpen tirkelgen ortasha táýliktik aýa temperatýrasynyń +8 gradýstan jáne odan joǵary bolýyna baılanysty jylytý maýsymyn toqtatý týraly sheshim qabyldandy,— dep jaýap berdi ákimdikten Kazinform agenttigi joldaǵan saýalǵa.

Jylý 10 sáýirde – aldymen ákimshilik ǵımarattarda, bilim berý mekemelerinde, mádenıet nysandarynda, odan keıin turǵyn úıler men áleýmettik nysandarda sóndiriledi.

Bıyl uzyndyǵy 39 shaqyrym jylý jelilerin qaıta jańǵyrtý josparda.
Qazir jylý jelileri 56,1% tozǵan, qabyldanǵan sharalar arqyly bul kórsetkishti 54,9%-ǵa deıin tómendetý kózdelgen.

— Aıta ketý kerek, 2024 jyly qalada 20 km jylý júıesi jańartyldy, 85 qazandyqta jóndeý jumystary júrgizildi, bul jylý berý tıimdiligin aıtarlyqtaı arttyryp, jylytý maýsymyn óshirmeı aıaqtaýǵa múmkindik berdi,— dep habarlady ákimdikten.

Buǵan deıin Almatyda halyqtyń áleýmettik osal tobyna kommýnaldyq qyzmet tarıfterdiń kóterilýine baılanysty ótemaqy tólenetini týraly jazǵanbyz.https://kaz.inform.kz/news/almatida-kommunaldik-tarifter-subsidiyalanadi-erbolat-dosaev-80cd94/