Almatyda jylý berý qashan toqtaıtyny aıtyldy
ALMATY. KAZINFORM – Almaty qalasynyń energetıka jáne sýmen jabdyqtaý basqarmasy agenttik saýalyna jaýap berip, qalada qashan jylý berý toqtaıtynyn habarlady.
Vedomstvo málimetinshe, qalalyq máslıhat bekitken qaǵıdalar boıynsha syrtqy aýanyń ortasha táýliktik temperatýrasy bes kún qatarynan +8°S jáne odan joǵary deńgeıde turaqty saqtalǵan jaǵdaıda Almaty qalasynyń jergilikti atqarýshy organy jylytý maýsymyn aıaqtaý týraly sheshim qabyldaıdy.
Jylý berý toqtatylǵannan keıin tutynýshylardy jylýmen jabdyqtaý júıesinen ajyratý myna kezekpen júzege asyrylady:
1) Ákimshilik ǵımarattar;
2) Turǵyn úıler;
3) Áleýmettik nysandar (balabaqshalar, mektepter, aýrýhanalar).
- Tutynýshylardyń ishki jylý júıelerine qyzmet kórsetetin avarııalyq (servıstik) uıymdar júıeni óz jaýapkershiligi sáıkes ajyratýy tıis. Eger mundaı qyzmet kórsetetin uıymdar bolmaǵan jaǵdaıda, tutynýshylar óz betinshe ajyrata alady nemese tıisti qyzmet kórsetetin uıymdy tartady. Jylytý júıesin ajyratý týraly akt «AlJJ» JShS-men rásimdeledi, - delingen basqarma jaýabynda.
Sonymen qatar energetıka jáne sýmen jabdyqtaý basqarmasynyń mamandary 2025-2026 jylǵy jylytý maýsymy oıdaǵydaı ótkenin, tek birneshe tehnıkalyq aqaý bolǵanyn atap ótti.
- Osy jylytý maýsymy kezeńinde II dárejeli 4 tehnologııalyq aqaý tirkeldi. Atalǵan jaǵdaılardyń barlyǵy jedel túrde oqshaýlanyp, qysqa merzimde tolyq joıyldy. Jylý jelilerindegi apattardyń negizgi sebebi - qubyrlardyń korrozııalyq tozýy, - dep túsindirdi vedomstvodan.
Aldaǵy ýaqytta jylý berý toqtatylǵan soń, birden kelesi jylytý maýsymyna daıyndyq jumystary bastalmaq. Bul jumystar Almaty qalasy ákimdiginiń «Qalalyq sharýashylyqty 2026-2027 jyldardaǵy jylytý maýsymyna daıyndaý týraly» ókimine sáıkes júzege asyrylady.
Jalpy bıyl uzyndyǵy 39 km bolatyn 66 nysanda jylý jelilerin rekonstrýktsııalaý josparlanyp otyr. Jylý jelilerin kúzgi-qysqy kezeńge daıyndaý jumystary belgilengen merzimde júrgiziledi. Bul jumystardy iske asyrýǵa qajetti qarajat bıýdjette qarastyrylǵan.
Eske salaıyq, 2025 jyldyń 8 qazanynan bastap qalada ortalyq jylytý júıesine qosylý jumystary bastaldy. Turǵyn úıler ortalyq jylý júıesine 10 qazannan bastap qosyldy.