Almatyda jylytý maýsymy shtattyq rejımde ótip jatyr
ALMATY. KAZІNFORM — Almatyda jylytý maýsymy 2024 jyldyń qazan aıynyń basynda bastalyp, shtattyq rejımde jumys istep tur. Jylytý júıesine 8 863 kópqabatty turǵyn úı, 404 bilim berý jáne 128 densaýlyq saqtaý nysany qosylǵan.
Qala ákimi Erbolat Dosaevtyń tóraǵalyǵymen ótken jedel keńeste 2024-2025 jyldaǵy jylytý maýsymynyń barysy talqylandy.
Energetıka jáne sýmen jabdyqtaý, kommýnaldyq ınfraqurylymdy damytý, bilim berý basqarmalarynyń basshylary, sondaı-aq «Almaty jylý jelileri» JShS, «AlmatyJylýKommýnEnergo» JShS, ShJQ «Almaty Sý» MKK, «Almaty elektr stantsııalary» AQ, «Alataý jaryq kompanııasy» AQ jáne «QazTransGazAımaq» AQ Almaty fılıalynyń ókilderi óz salasyndaǵy jaǵdaı týraly baıandama jasady.
Jylý jáne elektr qýatyn jetkizý turaqty túrde júzege asyp jatyr. Jylý kózderi men jelilerdegi temperatýralyq rejım bekitilgen kestege sáıkes qatań saqtalyp otyr.
«AlmatyJylýKommýnEnergo» JShS-niń málimetinshe, qalada 85 qazandyq bar, olardyń barlyǵy tehnologııalyq aqaýsyz jumys istep tur. Jalpy, qaladaǵy jylý jelileriniń uzyndyǵy 1 385,3 shaqyrym. Jylytý maýsymy bastalǵaly beri eshqandaı aqaý men jappaı apattyq jaǵdaı tirkelmegen. 2024 jyly qala turǵyndaryn úzdiksiz jylýmen qamtamasyz etý maqsatynda jalpy uzyndyǵy 20 shaqyrym bolatyn 23 jylý jelisi nysany jańartyldy.
Sonymen qatar, «Almaty elektr stantsııalary» AQ-nyń nysandarynda — 1-JEO, 2-JEO, Kaskad GES-i, Batys jylý kesheninde — energetıkalyq negizgi 56 qondyrǵyǵa jóndeý jumystary aıaqtaldy. Qazandyqtar, týrboagregattar, gıdroagregattar jóndeýden ótti.
«AlES» AQ-nyń energııa kózderinde (1-JEO, 2-JEO, BJK) mazýt qory 140% (25,6 myń tonnadan 18,3 myń tonna), kómir qory 179% (302,8 myń tonnadan 168,6 myń tonna).
Qalada tótenshe jaǵdaıdyń aldyn alý maqsatynda 400-ge jýyq maman men 100-den astam arnaıy tehnıkasy bar 104 apattyq brıgada jumys isteıdi.
«AlmatyJylýKommýnEnergo» JShS, «AlJJ», «AlES» AQ, «AJK» jáne ShJQ «Almaty Sý» MKK kommýnaldyq qyzmetteri joǵary daıyndyq rejıminde jumys istep tur.
Osyǵan deıin Almatyda jylý jelileriniń 63 paıyzy tozǵany týraly jazǵan edik.