Almatyda jylytý maýsymy bastalǵaly 153 órt tirkeldi
ALMATY. KAZINFORM – Jylytý maýsymy bastalǵaly beri Almatyda 153 órt boldy. Qalalyq tótenshe jaǵdaılar departamenti memlekettik órt baqylaýy basqarmasynyń bas mamany Dýlat Jandardyń aıtýynsha, eki adam qaza taýyp, taǵy úsh adam ártúrli jaraqat alǵan.
Almatyda jylytý maýsymy qala ákiminiń qaýlysyna sáıkes, 2025 jylǵy 8 qazanda resmı túrde bastaldy. Osy jylytý maýsymynda qalada tabıǵı gazdan ýlanǵan úsh derek tirkeldi. Alty adam zardap shekken, olardyń tórteýi – bala.
Tótenshe jaǵdaılar departamentiniń málimetinshe, qalada 151 myńnan astam jeke turǵyn úı esepke alynǵan. Qatty otynmen jylytylatyn 1 450 úı, qańqaly-qamysty tıptegi 5 605 eski úı erekshe nazarda eken. Sonymen qatar áleýmettik osal otbasylar turatyn 689 úı men qıyn adamdar turatyn 4 myńnan astam úı jeke sanatqa engizilgen.
Vedomstvo ókiliniń aıtýynsha, aldyn alýdyń tıimdi tásilderiniń biri – kómirtek totyǵyn anyqtaıtyn datchıkter ornatý. 2018 jyldan beri qala men aýdan ákimdikteriniń qoldaýymen jeke úılerge osyndaı 1 740 datchık ornatylǵan.
2025-2026 jyly jylytý maýsymynyń ózinde 280 qurylǵy ornatyldy. Olar kómirtek totyǵynyń qaýipti deńgeıin der kezinde anyqtap, oqys oqıǵanyń aldyn alýǵa kómektesedi.
Eske salaıyq, buǵan deıin Astanada jylytý maýsymy bastalǵannan beri 55 órt tirkelgenin habarlaǵan edik.