Almatyda jylytý maýsymy aıaqtalsa da, aýa sapasy nege jaqsarmaı tur
ALMATY. KAZINFORM — Almatyda keıingi bir aptadan beri aýa temperatýrasy qalyptan joǵary bolyp, aptap ystyq saqtalyp tur. Qalalyq ekologııa departamentiniń basshysy Dinmuhamed Lesbekov jazǵy ystyqtyń megapolıstegi aýa sapasyna áseri týraly túsindirdi.
Onyń sózinshe, jylytý maýsymy aıaqtalǵanymen, aýany lastaıtyn negizgi faktor ózgergen joq.
— Aýa lastanýynyń eń joǵary kórsetkishteri kóbine jylytý kezeńine sáıkes keledi. Jaz aılarynda jylý júıeleri jumys istemeıdi. Degenmen atmosferaǵa taraıtyn zııandy zattardyń negizgi kózi áli de avtokólikter bolyp otyr. Qaladaǵy jalpy shyǵaryndylardyń shamamen 60 paıyzy kólik quraldarynyń úlesine tıedi. Ókinishke qaraı, eski avtokólik parki jazda da, qysta da aýanyń tolyq tazarýyna kedergi keltiredi, — dedi Dinmuhamed Lesbekov.
Mamannyń sózinshe, Almatydaǵy aýa sapasyna «Qazgıdromet» RMK turaqty baqylaý júrgizedi. Qala aýmaǵynda atmosferalyq aýanyń jaǵdaıyn baqylaıtyn 20 avtomatty monıtorıng stantsııasy jáne bes statsıonarlyq baqylaý beketi jumys isteıdi.
Dinmuhamed Lesbekovtiń málimetinshe, jaz mezgilinde, tipti aýa temperatýrasy shekten tys kóterilgen kúnderdiń ózinde, baqylaý beketteri qys mezgilindegideı aýanyń asa joǵary deńgeıde lastanǵanyn tirkemeıdi.
Eske salaıyq, buǵan deıin Almatyda aptap ystyq bastalǵaly jedel járdem shaqyrtýy kóbeıgenin jazǵanbyz.
