Almatyda jyl sońyna deıin jármeńkeler aptasyna 3 ret ótedi

ALMATY. KAZINFORM — Áýezov jáne Bostandyq aýdandarynda demalys kúnderi ótetin jármeńkeler úsh kúndik jumys formatyna kóshedi. 

Almaty ákimdiginiń málimetinshe, jańa jylǵa deıin aýyl jármeńkeleri keńeıtilgen formatta — juma, senbi jáne jeksenbi kúnderi jumys isteıdi.

— Úsh kúndik jumys rejımine kóshý qala turǵyndary men qonaqtaryna yńǵaıly ýaqytta myńnan astam ónim túrin, onyń ishinde kókónis, jemis-jıdek, et jáne sút ónimin, sondaı-aq áleýmettik mańyzy bar azyq-túlik taýaryn tıimdi baǵamen satyp alýǵa múmkindik beredi. Ásirese, bul mereke kúnderi qarsańynda mańyzdy, — dep habarlady ákimdikten.

Qalanyń basqa aýdanynda jármeńkeler burynǵydaı eki kúndik formatta jumysyn jalǵastyrady. Jármeńkeler ótetin mekenjaılar:

* Áýezov aýdany — Ótegen batyr kóshesi (Abaı dańǵylynan tómen);
* Bostandyq aýdany — «Qazaqfılm» shaǵynaýdany (Ál-Farabı dańǵylynan joǵary);
* Almaly aýdany — Masanchı kóshesi (Áıteke bı jáne Gogol kósheleriniń arasy);
* Almaly aýdany — Jambyl jáne Áýezov kósheleriniń qıylysy;
* Medeý aýdany — Meńdiqulov býlvary — Bekturov kóshesi;
* Jetisý aýdany — «Qulager» shaǵynaýdany, Serikov kóshesi, 2.

Jyl basynan beri jármeńkeler arqyly jalpy kólemi 8,8 myń tonnadan astam azyq-túlik ónimi satylǵan.

Eske salaıyq, buǵan deıin elordada kezekti «Soǵym-FEST» et jármeńkesi ótetinin jazǵanbyz.