Almatyda jyl sońyna deıin myńnan astam sham aýystyrylady
ALMATY. KAZINFORM – Almatynyń Energetıka jáne sýmen jabdyqtaý basqarmasy «Almaty Qala Jaryq» MKK-men birlesip, qalanyń syrtqy jaryqtandyrýyn jańǵyrtý boıynsha jumystardy jalǵastyryp jatyr.
Jańartylǵan nysandardyń qatarynda Respýblıka Saraıy, Shýhov jáne «Drýjba» skverleri, Tólebaev kóshesindegi alleıa, Seıfýllın dańǵyly, sondaı-aq Sholohov jáne Saıyn kósheleri bar.
Respýblıka Saraıynyń aýmaǵynda 60 jańa jaryqtandyrý tiregi ornatylyp, 700 metr 5×10 kabel tartyldy. Shýhov skverinde qýaty 100 Vt (3000K) 32 torsher shamy ornatyldy. «Drýjba» saıabaǵynda 65 eskirgen sham energııa tıimdiligi joǵary (100 Vt, 3000K) zamanaýı jaryq kózine aýystyryldy.
Buǵan qosa,Tólebaev kóshesinde 97 sham aýystyrylyp, trotýarlar birkelki jaryqtandyrylyp jatyr. Sholohov kóshesindegi eski shamdardyń ornyna 210 torsher paıda boldy, sonyń arqasynda energııa tıimdiligi de artty. Saın kóshesindegi 150 Vatt shamdardy neǵurlym qýatty 200 vatt shamdarǵa aýystyrý júrgizilip jatyr. Qazirdiń ózinde 750 sham jańartyldy.
Atalǵan is-sharalardy júzege asyrý jaryqtandyrý deńgeıin jáne jol qozǵalysy qaýipsizdigin arttyrýǵa, qala turǵyndary men qonaqtary úshin neǵurlym jaıly jaǵdaı jasaýǵa yqpal etip, qoǵamdyq keńistikterge zamanaýı sáýlettik kórinis berip otyr.
Eske salaıyq, buǵan deıin Almatynyń keıbir aýdanynda 10 qazanǵa deıin elektr jelilerindegi jóndeý jumystaryna baılanysty jaryq ýaqytsha sóndiriletinin jazǵanbyz.