Almatyda jyl basynan beri jol apattarynan 84 adam qaza tapty

Almatyda osy jyldyń 10 aıynda 2 991 jol kólik apaty tirkelip, 84 adam qaza tapty. Bul týraly óńirlik kommýnıkatsııalar qyzmetiniń alańynda qalalyq Polıtsııa departamentiniń resmı ókili Saltanat Ázirbek málim etti, dep habarlaıdy Kazinform.

Spıkerdiń sózinshe, jyl basynan beri 1 582 980 jol qozǵalysy erejeleri buzylǵany anyqtaldy. Kólik quralyn mas kúıinde basqarǵany úshin 1718 adam ustaldy. Sot 2 443 júrgizýshini kólik quralyn basqarý quqyǵynan aıyrdy.

«Osy jyldyń 10 aıynda Almatyda 2 991 kólik apaty tirkelip, sonyń saldarynan 3211 adam túrli dene jaraqatyn aldy. 84 adam kóz jumdy. Bizdiń qalamyzda «Qorǵaý – qaýipti júrgizýshi» avtomattandyrylǵan júıesi jumys isteıdi, ol qozǵalystyń qarsy jolaǵyna shyǵatyndardy, jalǵan nómirlik belgilerdi paıdalanatyn jol qozǵalysy erejelerin buzýshylardy, kólik quralyn basqarý quqyǵynan aıyrylǵan, biraq soǵan qaramaı, kólik júrgizetinderdi anyqtaýǵa múmkindik beredi», - dedi Saltanat Ázirbek.

Polıtsııa departamentiniń resmı ókili jol erejesin kóbine jastar buzatynyn aıtty.

«Jańadan kólik aıdap júrgender óte saq, biraq olardyń tájirıbesi az. Ókinishke oraı, olar jaǵymsyz jaǵdaılarǵa tap bolady, apat jasaıdy, árıne, aýyr zardaptarmen emes. Aıta ketý kerek, eń jaqsy qaýipsiz júrgizýshi – tártipke baǵynǵan, kásibı, jol qozǵalysy erejelerin qatań saqtaıtyn, jol qozǵalysynyń basqa qatysýshylaryna qurmetpen qaraıtyn adam», - dedi spıker.