Almatyda jyl basynan beri jol apatynan 24 jaıaý júrginshi kóz jumdy
ALMATY. KAZINFORM — Almatyda «Jaıaý júrginshi» profılaktıkalyq aktsııasy ótip jatyr.
Jyl basynan beri Almatyda jaıaý júrginshilerdiń qatysýymen 2 myńǵa jýyq jol-kólik oqıǵasy tirkeldi. Apat saldarynan 24 adam qaza taýyp, 2 myńnan astam adam jaraqat alǵan.
Aktsııa aıasynda polıtsııa qyzmetkerleri jol qozǵalysy erejeleriniń saqtalýyn, onyń ishinde júrgizýshilerdiń jaıaý júrginshilerge jol berý talaptaryn baqylaýdy kúsheıtti.
— Joldaǵy qaýipsizdik árbir jol qozǵalysyna qatysýshyǵa baılanysty. Júrgizýshiler jaıaý júrginshiler ótkeline jaqyndaǵanda asa muqııat bolýy qajet. Al jaıaý júrginshiler jol qozǵalysy erejelerin saqtap, joldy tek belgilengen jerlerden kesip ótýge tıis, — dedi Almaty polıtsııa departamenti Ákimshilik polıtsııa basqarmasynyń bastyǵy Ábdinur Tasybaev.
Eske salaıyq, almatylyqtar bir táýlikte 1500-den astam ret jol erejesin buzǵanyn habarlaǵan edik.
