Almatyda jyl basynan beri úshinshi úshem dúnıege keldi
ALMATY. KAZINFORM — 2026 jylǵy 7 mamyrda Almatynyń № 2 qalalyq perınataldyq ortalyǵynda úshem dúnıege keldi. Buǵan deıin erli-zaıypty eki bala tárbıelep otyrǵan.
Almaty qoǵamdyq densaýlyq saqtaý basqarmasynyń málimetinshe, sábıler júktiliktiń 35-aptasynda kesar tiligi arqyly dúnıege kelgen. Jańa týǵan úsh qyzdyń salmaǵy 1399, 1694 jáne 1677 gramm bolǵan.
— Týǵannan keıin qyzdar jańa týǵan nárestelerdiń jansaqtaý bóliminde bolyp, úsh kún boıy qajetti medıtsınalyq kómek pen SIPAP apparaty arqyly tynys aldy, — dep habarlady vedomstvo.
Qazirgi ýaqytta balalar anasymen birge bir palataǵa aýystyrylǵan. Dárigerlerdiń aıtýynsha, sábılerdiń jaǵdaıy turaqty ári olar mamandardyń baqylaýynda.
Aıta keteıik, bul — bıyl № 2 qalalyq perınataldyq ortalyqta dúnıege kelgen alǵashqy úshem. Buǵan deıin ortalyqta 41 egiz jaryq dúnıe esigin ashqan.
Eske salaıyq, buǵan deıin Almatyda 39 jastaǵy áıel úshem bosanyp, birden kópbalaly ana atanǵanyn jazǵan edik.
