Almatyda jyl basynan beri turmystyq zorlyq-zombylyqqa qatysty qansha shaǵym tústi
ALMATY. KAZINFORM — Almatyda otbasylyq-turmystyq qatynas salasyndaǵy qylmys sany azaıdy. 2026 jyldyń basynan beri osyndaı 67 derek tirkelse, byltyr osy ýaqytta bul kórsetkish 71 bolypty. Bul týraly Almaty polıtsııa departamenti Qoǵamdyq qaýipsizdik basqarmasy bastyǵynyń orynbasary Aıtan Eleýsizov aıtty.
— Buryn otbasylyq janjal kóbine árkimniń jeke isi retinde qabyldansa, búginde mundaı áreketke naqty quqyqtyq baǵa beriletin boldy. Zorlyq-zombylyqtyń psıhologııalyq, seksýaldyq nemese ekonomıkalyq sııaqty kez kelgen túri jol berýge bolmaıtyn áreket jáne ol zańmen belgilengen jaýapkershilikke ákeledi, — dedi Aıtan Eleýsizov Óńirlik kommýnıkatsııalar qyzmetinde ótken brıfıng kezinde.
Polıtsııa ókilderi qazir qysym kórsetý azamattyń qaýipsizdigine tónetin eleýli qater retinde qarastyrylatynyn atap ótti. Qýdalaý áreketi úshin qylmystyq jaýapkershilik engizilgennen keıin quqyq qorǵaý organdary mundaıdy anyqtaý men zardap shekkenderdi qorǵaý jumysyn kúsheıtken.
— Kóp jaǵdaıda stalkıng turaqty qońyraý shalýdan, qorqytyp, ańdyp, júrip-turýyn baqylap, psıhologııalyq qysym jasaýdan bastalady. Keıde balalary, týystary arqyly da qysym kórsetip jatady. Mundaı árekettiń sońy keıin aýyr qylmysqa alyp kelýi múmkin. Sondyqtan polıtsııa zorlyq-zombylyqtyń erterek aldyn alýǵa tyrysady, — deıdi polıtsııa ókili.
2026 jyldyń sáýir aıynyń qorytyndysy boıynsha 3 104 adam profılaktıkalyq esepke qoıylypty. 2 557 quqyqbuzýshyǵa qatysty qorǵaý nusqamalary shyǵarylsa, taǵy 547 adamǵa sot erekshe minez-qulyq talaptaryn belgilegen. Qorǵaý nusqamasyn buzǵany úshin 127 adam, erekshe talaptardy buzǵany úshin 145 adam jaýapkershilikke tartylypty.
Otbasylyq-turmystyq qatynastar salasyndaǵy ákimshilik quqyqbuzýshylyq úshin 2 173 adam ákimshilik jaýapkershilikke tartylǵan. Jyl basynan beri polıtsııaǵa osyndaı 4 952 aryz-shaǵym men habarlama túsken. Polıtsııa jábirlenýshilerdiń qaýipsizdigin qamtamasyz etý 17 adamdy ýaqytsha abaqtyǵa qamap, quqyq buzǵan taǵy adam 347 arnaýly oryndarǵa ornalastyrǵan.
Sottar tarapynan da jábirlenýshini qorǵaýdyń qosymsha sharalary qabyldanyp jatyr. Atap aıtqanda, quqyqbuzýshylarǵa qatysty 30 erekshe minez-qulyq talaby belgilenip, 6 jaǵdaıda jábirlenýshige jaqyndaýǵa tyıym salynǵan.
Sonymen qatar jyl basynan beri 78 adam alkogolızmnen májbúrli emdelýge jiberilip, taǵy 30 quqyqbuzýshy psıhokorrektsııa kabınetindegi arnaýly psıhologııalyq baǵdarlamalardan ótken.
Al jyl basynan beri daǵdarys ortalyqtaryna 24 áıel jiberilip, olarmen birge 49 kámeletke tolmaǵan bala ornalasqan. Almatyda zorlyq-zombylyqtan zardap shekkenderge kómek kórsetetin 16 memlekettik emhana jumys isteıdi.
Eske salaıyq, buǵan deıin QR Іshki ister mınıstriniń orynbasary Sanjar Ádilov QR ІІM Esirtki qylmysyna qarsy is-qımyl komıteti tóraǵasy Danııar Meıirhanǵa qatysty stalkıng boıynsha qylmystyq istiń toqtatylǵanyn habarlaǵan edi.
