Almatyda jyl basynan beri tórt bala terezeden qulap ketti
ALMATY. KAZINFORM – Almatyda jazǵy demalys bastalǵaly balalardyń qaýipsizdigine qatysty qaýip kúsheıdi. Jyl basynan beri tórt bala terezeden qulap, taýda ondǵan jasóspirim qutqarýshylardyń kómegine muqtaj bolǵan.
Almaty tótenshe jaǵdaılar departamentiniń Joıý basqarmasynyń bastyǵy Denıs ıArtsevtiń aıtýynsha, balalardyń basynan ótetin oqys oqıǵanyń kóbi baqylaýsyz ketip, qarapaıym qaýipsizdik erejesin saqtamaǵannan bolady eken. Bıyl terezeden qulaǵan osyndaı tórt bala tirkelgen. Zardap shekkender 6-8 jas aralyǵyndaǵy balalar bolyp shyqty. Qaza tapqandar joq.
Mundaı oqıǵanyń kóbi kóp qabatty turǵyn úıde bolady. Vedomstvo ókili osyǵan baılanysty ata-analarǵa terezege arnaýly bekitkish pen shekteý qurylǵysyn ornatyp, balalardy ashyq terezeniń janynda qaraýsyz qaldyrmaýdy eskertti.
– Bala terezeniń aldyna shyǵyp ketpes úshin jıhazdy terezeden alystaý qoıyp, terezege arnaýly bekitkish pen shekteý qurylǵysyn ornatýy kerek. Moskıt torynan eshqandaı paıda joq. Balalar oǵan súıengende, tor balanyń salmaǵyn kótere almaýy múmkin, - dedi Denıs ıArtsev.
Jaz mezgilinde balalar otpen oınap, saldarynan órt te shyǵady. Sondyqtan balalarǵa órt qaýipsizdigi erejesin aıtyp, órt shyqqanda ne isteý keregin árkim óz balasyna jan-jaqty túsindirýi kerek.
Tipti shaǵyn órt oshaǵyn baıqasa da, dereý ǵımarattan shyǵyp, eresekterge habarlap, «101» nemese «112» nómirleri arqyly tótenshe qyzmetterdi shaqyrý keregin ár bala bilip júrýge tıis.
Tótenshe jaǵdaılar departamentiniń málimetinshe, 2025 jyly qutqarýshylar Almaty men oblystyń taýynda 88 jasóspirimge kómek kórsetken. Bıyl 17 bala qutqarylǵan.
Jazataıym oqıǵaǵa kóbinese eresekterdi ertpeı, balalardyń óz betinshe jolǵa shyǵýy sebep bolyp jatady eken. Mamandar saparǵa shyǵarda kún raıyn bilip almaı, joldyń qıyndyǵyn eskermeı, qajetti zattardy túgel alyp shyqpaýy da negizgi sebeptiń biri dep atap otyr.
Jaz mezgilinde sý aıdynyndaǵy qaýipti oqıǵalar da artady. Qutqarýshylar balalarǵa eresekterdiń qaraýynsyz sýdyń mańyna jolaýǵa bolmaıtynyn, tek arnaıy jabdyqtalǵan orynda ǵana shomylýy keregin eske saldy.
TJD ókilderi sýǵa batyp bara jatqan adamdy kórgen jaǵdaıda áreket etý tártibin de túsindirdi. Eń áýeli qutqarýshylar men jedel járdem qyzmetin shaqyrýy qajet, sodan keıin ǵana jeke qaýipsizdik sharalaryn saqtap, zardap shegýshige kómek kórsetýge tyrysýy kerek.
Eske salaıyq, jyl basynan beri elimizde segiz bala terezeden qulap, mert bolǵanynyn habarlaǵan edik.
