Almatyda jyl basynan beri qansha jol erejesi buzylǵany anyqtaldy
Almatyda jyl basynan beri 1 mln 866 myń 741 jol erejesin buzý deregi anyqtaldy. Bul týraly Almaty qalalyq polıtsııa departamentiniń jergilikti polıtsııa qyzmeti basqarmasy bastyǵynyń orynbasary, polıtsııa polkovnıgi Serik Shýmaev aıtty, dep habarlaıdy Kazinform.
«Kólikti mas kúıinde basqarǵan 1 843 júrgizýshi ustaldy. Sot 2 443 júrgizýshini kólik quralyn basqarý quqyǵynan aıyrdy. 1 754 kólik júrgizýshisi ákimshilik qamaýǵa alyndy. Esterińizge sala keteıin, zańda kólikti mas kúıinde basqarǵany úshin jaza qataıtyldy. Birinshi ret bolsa kólik quralyn basqarý quqyǵynan aıyrý merzimi - 7 jyl. Sonymen qatar 15 táýlikke deıin ákimshilik qamaýǵa alý qarastyrylǵan», - dedi Serik Shýmaev.
Sonymen qatar, Jergilikti polıtsııa qyzmetiniń málimetinshe qala joldarynda jyl basynan beri 3 195 jol apaty tirkelip, saldarynan 3 415 adam zardap shegip, 94 adam qaza tapqan.
