Almatyda jyl basynan beri beıresmı jumysqa qatysty 500-den astam shaǵym tústi

Almaty boıynsha memlekettik kirister departamentiniń kameraldyq monıtorıng basqarmasynyń basshysy Dáýren Qaımuhametovtiń aıtýynsha, qalada jumys berýshilerdiń qyzmetkerlerdi resmı túrde rásimdemeı, jalaqynyń bir bóligin «bólek» beretini áli de azamaı tur eken. «Kóp aqsha alsam boldy» degen oımen azamattardyń kóbi mundaı shartqa kelise salyp, onyń saldary qandaı bolaryna bas qatyra bermeıtin kórinedi.

– Bir qaraǵanda, jalaqysyn jasyrý jumys berýshige de, qyzmetkerge de tıimdi bolyp kórinýi múmkin, biraq keıin munyń kesiri tıedi. Zeınetaqy men áleýmettik aýdarym jasalmaǵanyn zeınetke shyǵyp, dekrettik tólemdi, járdemaqyny alar kezde baryp bir-aq biledi, - deıdi Dáýren Qaımuhametov.

Departament ókilderi resmı jumysqa ornalasý adamnyń áleýmettik qorǵalýyna tikeleı áser etetinin eske saldy. Resmı aýdarym bolmasa, eńbek ótili eseptelmeıdi. Zeınetaqy mólsheri de azaıyp, eńbekke jaramsyzdyq paraǵyn, demalys aqysy men járdemaqyny rásimdeýde qıyndyq keltiredi.

– Resmı jumys adamǵa jalaqy ǵana emes, áleýmettik kepildik te beredi. Olar – zeınetaqy jınaqtary, medıtsınalyq saqtandyrý, jumysynan nemese eńbekke jaramsyz bolyp qalǵan jaǵdaıda tólenetin tólemder. Sonymen qatar resmı tabystyń bolýy nesıe men basqa da qarjylyq qyzmetti rásimdeý kezinde mańyzdy ról atqarady, - deıdi basqarma basshysy.

Memlekettik kirister departamentiniń túsindirýinshe, páter, avtokólik nemese basqa da múlik satyp alynǵan jaǵdaıda salyq organdary azamattyń resmı tabysy men satyp alynǵan múliktiń qunyn salystyra alady. Shyǵyn kólemi deklaratsııalanǵan tabystan aıtarlyqtaı joǵary bolsa, azamat qarajattyń qaıdan alynǵanyn túsindirýge mindetti. Dáýren Qaımuhametovtiń aıtýynsha, bul qosymsha tekseriske alyp kelýi múmkin.

– Resmı tabys múliktiń qunyna sáıkes kelmese, memlekettik organdarda qarajatty qaıdan alǵanyn qatysty suraq týyndaıdy. Sodan qosymsha salyq, ósimpul salynyp, ákimshilik jaýapkershilikke tartylýy múmkin. Búgin tıimdi bolyp kóringen nárse keıin osylaı shyǵyn shektiredi, - deıdi Dáýren Qaımuhametov.

Memlekettik kirister departamenti barlyq eńbek sharttary Enbek.kz portalynda tirkelýge tıis ekenin eske saldy. Zeınetaqy jarnalary men áleýmettik aýdarymdardy eGov.kz portaly, BJZQ-nyń jeke kabıneti, e-Salyq Azamat mobıldi qosymshasy men ekinshi deńgeıli bankterdiń qosymshalary arqyly tekserýge bolady.

Almatynyń memlekettik kirister departamenti jumys berýshilerdi qyzmetkerlerdi resmı túrde rásimdep, barlyq mindetti salyq pen áleýmettik tólemdi ýaqytyly aýdarýǵa úndedi. Al azamattar ózderiniń resmı jumyspen qamtylǵanyn baqylap, aýdarymnyń turaqty túrde júrgizilip otyrǵanyn tekserip otyrǵany jón.

Eske salaıyq, buǵan deıin Qazaqstanda jalaqy bereshegi boıynsha 642 mln teńge anyqtalǵanyn jazǵanbyz.