Almatyda jyl basynan beri alkogoldik masań kúıde 224 qylmys jasaldy
ASTANA. KAZINFORM — Almaty qalasynyń polıtsııasy alkogoldik masań kúıde jasalatyn quqyq buzýshylyqtardyń aldyn alý maqsatynda profılaktıkalyq jumystardy júıeli túrde júrgizip keledi. Osyǵan baılanysty tártip saqshylary alkogol ónimderin satatyn saýda oryndarynyń ıeleri men satýshylaryna qoldanystaǵy zańnama talaptaryn túsindirip, olardy buzǵan jaǵdaıda kózdeletin jaýapkershilik týraly eskertip jatyr.
Kezekti profılaktıkalyq is-sharany Almaty polıtsııa departamentiniń profılaktıkalyq jumysty úılestirý basqarmasy Almaly aýdandyq polıtsııa basqarmasymen birlesip uıymdastyrdy. Kezdesý barysynda alkogol ónimderin ótkizý qaǵıdalaryn saqtaý jáne zań buzýshylyqtardyń aldyn alý máseleleri talqylandy.
Polıtsııa málimetinshe, jyl basynan beri Almatyda alkogoldik masań kúıde 224 qylmys jasalǵan. Onyń ishinde 97 derek qasaqana aýyr dene jaraqatyn salýǵa qatysty.
Almaty polıtsııa departamenti profılaktıkalyq jumysty úılestirý basqarmasynyń bastyǵy Jandos Kavlıevtiń aıtýynsha, mas kúıinde jasalǵan árbir qylmys — adam taǵdyryna áser etetin qaıǵyly oqıǵa. Sondyqtan mundaı quqyq buzýshylyqtardyń aldyn alý úshin alkogol ónimderin satatyn saýda oryndarymen túsindirý jumystary turaqty túrde júrgizilip jatyr.
Polıtsııa azamattardy alkogoldi jaýapkershilikpen tutynýǵa, onyń saldaryn eskerýge jáne quqyq buzýshylyq pen qaıǵyly jaǵdaılarǵa ákelýi múmkin áreketterden aýlaq bolýǵa shaqyrdy.
