Almatyda jyl basynan beri 6 úshem dúnıege keldi
ALMATY. KAZINFORM — Almatyda jyl basynan beri 603 egiz jáne alty úshem dúnıe esigin ashty.
Almaty qalasy Densaýlyq saqtaý basqarmasynyń málimetinshe, jýyrda № 2 qalalyq perınataldyq ortalyqta 27 jastaǵy almatylyq kelinshek úshem uldy dúnıege ákeldi.
Bul ananyń ekinshi júktiligi eken. Endi ol tórt uldyń anasy atandy. Úshemniń tórt jastaǵy aǵasy bar.
— Júktilik trıhorıaldy trıamnıotıkalyq túrde ótken, ıaǵnı, ár sábıdiń jeke platsentasy men uryq qaby bolyp, úsheýi bir-birinen bólek damyǵan. Sábıler kesar tiligi arqyly dúnıege keldi, — dep málimdedi Almaty qalasy Densaýlyq saqtaý basqarmasy.
Nárestelerdiń salmaǵy 1740 gramnan 1978 gramǵa deıin, al boıy 34-37 santımetr aralyǵynda boldy. Ata-anasy uldaryna Omar, Mıras jáne Múslim dep at qoıdy.
Sábılerdiń biri eki kún boıy ókpeni jasandy jeldetý apparatyna qosyldy. Qazir úsh náreste de SIPAP-terapııa alyp jatyr. Mamandar olardyń jaǵdaıynda oń dınamıka baıqalyp otyrǵanyn atap ótti.
Úshemniń anasy uldaryn alǵash kórgende, qatty tolqyp ketkenin aıtty.
— Balalarymdy alǵash kórgende qatty ýaıymdap, jylap jiberdim. Óıtkeni olar óte kishkentaı ári álsiz kórindi. Biraq ortalyq qyzmetkerleri maǵan úlken qoldaý kórsetti. Olar medıtsınalyq kómekpen qatar, psıhologııalyq turǵydan da demeý boldy. Dárigerler men ortalyqtyń barlyq qyzmetkerine qamqorlyǵy, yqylasy jáne qoldaýy úshin shyn júrekten alǵys aıtamyn, — dedi ol.
Sábıler № 2 qalalyq perınataldyq ortalyq mamandarynyń turaqty baqylaýynda.
Eske salsaq, Almatyda bir aıda eki úshem dúnıege kelgenin habarladyq.
